على شبكات التواصل الاجتماعي كتب بعض الشباب بعض التعليقات على الفئة العمرية التي شملها قانون التقاعد من كلمات خادشه بانهم انتهى دورهم او خرفوا وعديمي الفائدة وسلبوا حقوقنا من اجل التعيين فكتبت احدى المعلمات هذا الرد
(كلمات خادشة للضمير)
كثير من الشباب صار يُصرح علناً ان كبار السن من الموظفين عبئاً على الدولة وانهم منافسون لهم لفرص العمل التي باتت املا لكل الشباب..
احب ان اكوللكم شباب احنا مو عالة على احد. احنا الجيل الذهبي..
احنا اخر جيل شاف الجيل الي كان يركب الخيل والجمال.. وجيل يركب الفيراري..
احنا اخر جيل من الامهات ماننام الا ينامون كل اهل البيت ونطفي كل سويجات الكهرباء وتقفل الابواب والحنفيات.
احنا اخر جيل البنية ترضى بنصيبها حتى لو كان الرجل فقير وبسيط تظل تحترمه وتحترم اهلها وتصبر ومقتنعين بمقولة بنت الحمولة تصبر وتخاف على سمعة اهلها.
احنا اخر جيل بي ام البيت الها كلمتها والكل تطيع بلا نقاش..
احنا اخر جيل نكعد من الفجر ونشعل التنور ونتنغص الخبز الحار لاهل البيت بالريوك وننطي للجيران حصتهم من ورا الحايط..
احنا اخر جيل قرا قصص بكد شعر الراس وشاف مسلسلات هادفة وتشاركنا التوقعات ونحضر مسبقا شغلات التعلولة.. حب ركي جمعناه من بعد مانخلص الركية او البطيخة ونيبس البذور وبعدين نحمصه ما نترك شي الا ونستفاد منه..
احنا اخر جيل ماكانت المادة اساس بحياتنا ونشوف الفقير بعين الاحترام لان مؤمنين انها ارزاق موزعة من رب العالمين.
احنا اخر جيل يفرح بالخطار بلا سابق موعد ونكيف على لمة الجهال. ومن نسمع زقزقة العصافير نتوقع الخطار او من جاهل يشيل مكناسة نتحضر نتوقع خطار ونلبس احلى ملابسنا..
احنا اخر جيل نشتري البازة بموسم الشتا ونخيط لكل اهل البيت مرة وحدة شتاءا ونخيط دشاديش الكودري او تترون بالصيف..
احنا اخر جيل لبس العباية ولكن لبسنا الطويل والقصير تحت العباية ومحد كان يعترض..
احنا اخر جيل ابن الجيران اخ فعلي..
احنا اخر جيل نسوي المعجون بالموسم ونيبس البامية والباذنحان ونسوي انواع الطرشي والمربة
احنا اخر جيل استخدم طباخ النفط والفانوس وصوبة علاء الدين..
احنا اخر جيل يخيط الدوشك واللحاف من الصوف او القطن
واتغطى ببطانية فتاح باشا الخشنة..
احنا اخر جيل من نزور الشيخ عبد القادر لانه رجل بركة مو لانه سني ونزور سيدنا علي ونتبارك بمقامه مو لانه شيعي ولكن لان هو ابن عم الرسول وزوج سيدة نساء العالمين..
احنا اخر جيل ما سألنا عن اختلافنا بين الاديان لان عيب الكل اله حق بالحياة..
احنا اخر جيل نعتبر الوطن العربي وطننا من الخليج للمحيط.
احنا اخر جيل نسوي نزلية للجار الجديد ونتعرف عليهم وبيوتنا مفتوحة لمناسبات الجيران ان كانت فرح او حزن بدون تردد.
احنا اخر جيل نربي الدجاج ونجمع البيض ونذبلهن باقي الطعام وننكعلهن الخبز حتى ما ينذب اكل ويا النفايات..
احنا اخر جيل يظل شايل بجيبه الحلويات خاف طفل يلاكينه بالطريق او احد يتلكانه ننطيهياه.
احنا اخر جيل عاش ببيوت للايجار او ويا العيال وبنى وعمر لاولادهم ويتمنالهم افضل من عيشتهم.
احنا اخر جيل كنا نأجل الحج الا يكبرون الاولاد ونوفي الديون.
احنا اخر جيل يشتري كفنه والحنوط وصابونة الركي ونلبس محبس ذهب اجرة المغسلة..
احنا اخر جيل يطلع ينظف الشارع ويرش كدام الباب حتى الي يفوت يشتم ريحة الشارع طيبة.
احنا اخر جيل نسمع قران بصوت عبدالباسط عبد الصمد وبعدها نسمع فيروز.
احنا اخر جيل يصنع فرحة زكريا والمحيا ومولود النبي حزن محرم ويجتمع الجيران على صواني الاهل والاحباب ويا الدولمة وحلاوة التمن وعيش فاطمة والسمسم المخلوط بالشكر او الدبس..
احنا اخر جيل من نشوف معلمينا بالابتدائية ننهزم من الشارع لو نختفي باي طريقة..
احنا اخر جيل كانت اغنياته قصائد ويعشق صوت ام كلثوم واسمهان وعبد الوهاب..
احنا اخر جيل استخدم طابع البريد والرسائل والتلفون الارضي.
احنا اخر جيل كان الكتاب هو متعتنا والصف احلى مكان ممكن نكعد بي.
احنا اخر جيل نروح سفرات مدرسية لكل محافظات العراق دون خوف الاهل والمتعة بالاثار لاحدود لها..
احنا اخر جيل كتب بالقلم الحبر الباركر والمفكرة كانت عبارة عن يوميات نحتفظ بيها وتصير مذكرات نقراها كل فترة ونجدد روح المحبة لتلك الايام.
احنا اخر جيل اخذنا صور بالاسود والابيض والمصور هو الي يضيف الالوان والرتوش.
احنا اخر جيل نقرا القران يوميا..
احنا اخر جيل نبدا يومنا بسم الله الذي لايضر مع اسمه شيء في الأرض ولا في السماء وهو السميع العليم ونطوف بقراءة اية الكرسي ع البيت واهله.
احنا اخر جيل شرب المي من الحب والتُنكَة وفرش الحصيرة ونام بالسطح.
احنا اخر جيل لعبنا بالطفولة طم خريزة وتوكي وحاح والاولاد يفجرون البوتاز.
احنا اخر جيل تودع الزوج زوجها للعسكرية وهي تتحمل باقي اعباء البيت بكل تفاصيله بدون ضجر ولا منية
احنا اخر جيل ممكن ان نتمرض ومانراجع الطبيب لان المصرف ضامي للاولاد.
احنا اخر جيل يشوف الجيل السابق والجيل الحالي ولا يوجد ملتقى تقارب بين الجيلين واحنا تحملنا انتقاد الاجداد والاحفاد..
احنا اخر جيل يمكن ماتشوفون مثلنا بعد.. والحياة امانة تنتهي منا لتكملون المسار مو تطفرون من فوكانا وتدوسون على تعبنا.. انتم ثمارنا الي نخاف عليها من الهوا..
شبابنا انتم املنا وانتم المستقبل ولكن قد يأتي عليك يوم أمرُّ مما مر علينا فلا تنازع احداً على رزقه.. ربما رزقك معقود ببركة هذا الجيل الذهبي..
حفظ الله وطننا شيبة وشبابه
بقلم(عروبة الجميلي)
رد مع اقتباس
المشاركة الأصلية كتبت بواسطة صباح العراقي2
