قصيدة الخطوبة
على الموعد احقق حلمي فزيت
بجرحك جيت اداوي وجرحي ماطاب
وتلكتني ابتسامة اهلك.. وناس..!
سمعت يوم ال ألك واعرفت الاسباب
ابارك زفتك ضنوني من جيت
مايدرون اجيت اعليك خطاب
الناس تهلهل انا دموع هليت
وزفوني الشماته لعتبت الباب
موحفله زفاف كبالي لاكيت
شفت حلمي ولكن غيري بي طاب
من حنيت ايديك اعليه حنيت
من الحنه اغار شلون الاغراب
الحب موغصب جا بيك كضيت
بلمعاند اكض بيدي الهوى الهاب
رجع وجهك البي كتلي اهواك
بلكي بعينه توكف كلمه اعتاب
فراكك جنه جرحي يطوّل هواي
شنو ابيناتهن هم صاير اعجاب
جبتلك كلشي.. هسه تريد انساك؟؟
ماسامعها هاي منين تنجاب..؟؟
بشرط ماحن إلك إله ابقى وياك
شترك ياصور لورود لَنياب
اشكَ الصورة.. عطرك بلهوى شلون؟!
وي حسراتي يطلع عطرك الغاب
بدون اسباب ادري بكلبي طبيت
من تعوف كلبي انطيني لأسباب
بدل متدزلي عذرك دزلي دفان
اشتهيت خلاف حضنك حظن لتراب
كدرت تعيش دوني حجايتك وين
اليكدر دونك اذكر كتلي جذاب
رجع نومي جا هم تاخذه وياك
ماغافي وشفت كابوس الغياب
مامحتاج فَي خيعوفني الليل
شنو فاكد شمس لوفاكد احباب
كمت احسد برودك يالجنت حار !
كبل جنت احسد فراشك والثياب
قبل لتكلي احبك تنوي للغير؟؟
اشو زفوك تالي لحظن لغراب
كلام الناس يجرحني ويهنيك
الف مبروك اخذت الغيره ماحاب
انا انسانين واحد مني مبيوك
الهضيمه البايك يهنونه لصحاب
يدخل بيتكم.. موحقي اذا اغار
جنت وياك اسولف من ورى الباب
غص جفني بدموعي عرفتك انسيت
ضحكك عالي هم نسيت الآداب
احتركن امنياتي وعرفت الناس
مودمع الطلع من عيني عطاب
البس حلقه اذا لاكوني شمات
ويكلولي شعجب.. موعندك مصاب!
ادفنت لسرار كتلي وانت طشيت..
شفتها جناح بيها وطايرة اسراب
وذا مو انت ياهو الحاجي لسرار
دفنت اسراري قابل يحجي لتراب
تغلط والعذر مو انه سويت
شعجب بجروحي ماتغلط بلحساب
مدرسة الجرح ناقصها منهاج..
قصتي وقصتك يسوولها كتاب
حسن التميمي
رد مع اقتباس
