درر العراق

*RÂყÂм* · 9/January/2020

قصيدة : مشتعله نار الضماير
للشاعر : ناظم الحاشي
المناسبة : ليلة 13 جمادى الأولى 1441
حسينية داوود العاشور البصرة ابي الخصيب

مشتعله نار الضماير وَي نار باب البتول
والدم سِراج الشعاير لَحزان بِنْت الرسول
**********************************
دَمنه إشتعل من عرفنه سِر الوَلاء الوَحيد
يشتِعِل باب الزچيه لوما نِزَف دَم شَهيد
وإنطينه دمنه الأجِلها لمّن عرفنه إشتِريد
والها السبب دم زلمنه نار إشتَعَل بالوريد
تاريخ كِل المَراجِل محتار بينه إشْيگول
والدم سِراج الشعاير لَحزان بِنْت الرسول
*********************************
نتمَنّه كون إبزمنها خالقنه رب العِباد
نِلبَس چِفَن للزچيه لو لِبَس حيدر سَواد
نِگصِد علي إوما نِعوفه وإنگِلّه موبَس حِداد
تِلگانه سيف إبيمينَك لو ردِت تعلن جِهاد
وَي صولِتَك عالتريده گبلك يحيدر نِصول
والدم سِراج الشعاير لَحزان بِنْت الرسول
*********************************
من نور دَمنه المَشاعِل ضَوّت سِراج الوجود
والگاع صارت مَناجِل وإختارَت أحله الورود
من موت فاطِم عرفنه من نار ذاك الحَقود
تفرح وحوش البراري لمّن تِموت الاسود
وإعْرَفنه موت الشهاده بالموت أبَد مايزول
والدم سِراج الشعاير لَحزان بِنْت الرسول
********************************
لومِتنه كالطَف عَطاشَه لا وَحَق رَب الكِتاب
مابينَه جاهِل يبَدِّل كوثَر الزهره إبسراب
كلمن سأل خلّي يسمع من صوت شيعي الجواب
الحَرَگ باب الزچيّه قَدْ حَرَگ للكعبه باب
يصبح حَطَب وإبجَهَنّم غفران أبَد ماينول
والدم سِراج الشعاير لَحزان بِنْت الرسول
********************************
مَتهزنه ريح النواصب نِقسِم إبرَب الجَلال
وإحنه الجِبال الرواسي وياريح هَزّت جِبال
وإنطينه كِلمه اوثبتنه منعوف فاطم مُحال
وإحنه الرجال الوفينه والخالفت مو رِجال
والماعرفنه إوعرفنه ينصاب بينه إبذهول
والدم سِراج الشعاير لَحزان بِنْت الرسول
*********************************
موسَبعَه مَرّت علينه يوسِف سِنين الجَفاف
من موت بضعة نبينه لليوم كِلهن عِجاف
چم شاب من دم وريده حَنّته إچفوف العَفاف
وأملاك رَبّه إبزفافه سَووّله حَفلة زفاف
مِن غير حُب الشهاده ماعنده للحب ميول
والدم سِراج الشعاير لَحزان بِنْت الرسول
********************************
لو گطّعونه إعله حُبها إي وحق دم الجَنين
تجمعنه فاطِم بديها بَس نِدعي أم البنين
عِدنه اليقين إبشواهِد للموت هذا اليقين
الما آمِنَو بُم أبيها والله مو مؤمنين
ماچان أبَد حاربوهه لوچان عِدهُم عقول
والدم سِراج الشعاير لَحزان بِنْت الرسول
********************************
فاطم طريق الشهاده وإبغيره يعني إنتِحار
والشعَل باب الزچيّه ضَل مِشتِعِل جسمه نار
والسلب حقها وضربها لايضن هذا إنتصار
والله أبد ماوصلها لو هَد علي ابذو الفِقار
لكن وصيّة مُحمّد كَبِّلَت فَحل الفحول
والدم سِراج الشعاير لَحزان بِنْت الرسول

-------------------------------------------------