جبار عودة الخطاط
عينك بير
ويا ملح العطش فص
بيهن يگيّش
ولا جاسه التعب
شتحطله حتّه يموع
......
اشلون عيونك الغرگانه
تعطش
والعيون عيون نبعت
والرموش دموع
......
واشلون اتجوع؟
وانت غموس هذا الكون
من كل نوع
اسمك بالحصاد
ومنجلك مرفوع
......
نهرين الدمع
بخدودك الكلفات
وعطشهن ناي
يصرخ
واللحن بالديرة ما مسموع
......
يا ماي الحياة
وسر حفيف الشوگ
من سومر يطگ موال
أخضر بالحزن منگوع
.....
يا بستان نخل الله التصحّر
ليش؟
يا تمر الصلاه
بيها الأجر ممنوع
......
يا بلسم يداوي الغير
وچبدك مبتلي وموجوع
انت الناي
وانت الراي
وانت الماي
چا كلي العطش
منين اجاك بگلبه المشلوع
چا وينك حمد يبن البخت
والأصل والطيبات
يجاوبني الجرف:
يا صاحبي
....... مبيوع
رد مع اقتباس