صارت بالعكس شفناهه شوف العين
من شفنه الوطن شارد
تبدينه خريف نحور عالمصطاح
يامرواح ذري الدم
اچت ليكم هوادچ خوف
والچتال متلثم
شما يگرب ربيع الموت
ترد نحورنه تخظر
الوطن يسوه ونموت عليه
وخل شما يعطشونه ضحك وامال
يرد بينه الحرص يكبر
ياباگي العمر شتريد
كافي تعيش
وانت بلا نفس فحطان
صارت بالعكس شفناهه شوف العين
شفنه الماي بچفوف السفن مگيود
والملاح اهو السجان
يمردي الموت
مد ايدك لغمگ الدم
واتلمس مناحرنه
تلاگي شچم جرح لحسين
بس حسين مو يمنه
مبيوعين وانبعنه
يمردي الموت مد ايدك
وشيل الراس
خل انشوف
ياهو الطاح ياهو الباع
ياهو العامل الشراي
خل انشوف
ياهو الضاگ دمنه الطاح
ياهو الرش ورانه الماي
يا دولاب رد بينه الوكت موزين
رد بينه الغنه السبعين
من چان البخت فانوس
من چان العرد حايط تهابه النار
من چان الحرامي المايبوگ الچار
رد بينه المراجيح الگواني البالبساتين الظهاري التنلعب ختله
رد بينه يادولاب رد بينه
رد بينه الجگايرنه التتن واللف
رد بينه الهذاك الرف
لعگال الوبر رد بينه يادولاب
للناعور
رد بينه الحناني امنه
من يخلص خبزها ويهفت التنور
يادولاب رد بينه
الوكت مو زين يادولاب
غيث ال علك
رد مع اقتباس