هنا

[فقار الكرخي]

اون جرحي
اون جرحك
وياجرح اليون بالروح ؟
هيمة وصدى صوت النعي
يگطع بتوت الروح
سگينا الگاع دم ودموع
وطگ بيها شتال اخضر
لچن مذبوح
جزينه بسچة الاحلام
من يوم الخلگ لليوم
وعدينة الگحط والضيم
ومسافة لحد عرش لله
بكل خطوة جرح
يفتح چثيرة جروح
واون جرحك
وطر صبر السماء بنوحي
بلايه صياح
اون بالروح
يامزنة عشگ رذ
عشگ عالبيبان
واغسل وجه الولايات
فرح ناس
حلمت بالوطن والدار
طش دمك
خل يسيح بالتحرير
واسحگ سلطة التيجان
اسحگ كل عمامة زور
وينك عثر نذري
وتاه بين گبور
مامش دور
احنه بنص جهنم والمنايا تدور
احنه بنص مدينة وماكو بس گبور
واون جرحي
اون جرحك
جرح الناس
ياجرح اليون بالروح
ضايع من صرت لليوم
تاخذني جروح الناس
وتيه بسچة الضاعوا گبل ادم
وصوت براسي يسبگني
مو ذنبك ذنب ادم
وافرغ گاسي باديان اللحايا
وخلوة المحراب
لا تهتم مو ذنبك ذنب ادم
لچن ادم، رب ادم
يشوف الدم ؟
يسمع صوت ام مبحوح من النوح؟
شاف الموت ؟
لمح جفت ثدايا الهور؟
شاف شچم غصن مكسور ؟
شاف شگد بنينا گبور؟
ياكاس اليزيل الهم
ياكاس اليصحي الروح من سكر
العذاب و عيشة العلگم
شتون جرحي
انه مذبوح
اون جرحك
واون جرحي
وياجرح اليون بالروح










قيصرالسراي

[فضاء.]

رائعه و مؤلمه بكل معنى الكلمه..
مشكور ع النقل المميز

[انثى مخمليةة]

عاشت ايدك