هنا

[Gardi]

السلام عليكم

طبعاً من خلال احتكاكي مع موظفين وأساتذة جامعات لديهم القاب علمية فذة استاذ مساعد دكتور . دكتور. . وبروف . ومابعد البروف .....الخ

وجدتُ حرقة كبيرة في نفوسهم لانهم سيخرجون حسب قانون التقاعد الجديد الذي قدم عمر التقاعد . رايتهم بعيون حزينة
سالت احد البروفسورية فقال سوف يسلبون لقمة عيشي وعيش أطفالي .
وكان كل ذلك المسير في لحظة اصبح هباء اصبح لا شيء مابين ( البكلوريوس . الماجستير . الدكتوراة ) كانت رحلة شاقة للحظة قلت لهُ دكتور مو مشكلة سويت العليك وانت مثال يحتذى به ( على الرغم كان غير نزيه صراحة في بعض البحوث ومسالة السرقات العلميةً) ولكن وجب المواساه في لحظة التمست بها ضعف رجل كان يوما ما عميد جامعة و معاون اداري ورئيس قسم ووو )

سؤال يطرح نفسهُ. هل فعلا قانون التقاعد مجحف رأيكم مع التقدير

[Scrap]

اعتقد مجحف بحق الكفاءات لان عدم وجودهم راح يضر من الناحية العلمية
المشكلة الثانية اذا تقاعدوا منو راح يدرس طلاب الدراسات العليا؟
لو يعلقون القانون ل لقب استاذ ع الاقل يكون بي وجهة نظر

[ابراهيم حسن]

لابالعكس يجب اعطاء فرصه للخريجين الشباب ليأخذوا دورهم في بناء الوطن والمجتمع وعن قوله بأنه سيسلب عيشه فهذا لايؤمن ان الرزق على الله وهذا تقاعد وليس اقاله ..................... انتهى

[الملاذ الاخير]

اني مع وضد ..
قرارات الحكومة مجاي نفهمها ابد ..!

اني مع من حيث اعطاء فرصة للخريجين يحلون مكانهم .. وبعدين اكو دكاترة مخرفة ازالتهم افضل .

وضد القرار .. لان اكو دكاترة ذوي خبرة عملية فذة راح تخسرهم الطلاب والجامعات ويخسرهم حتى العراق .!
وحتى الدكاترة اللي تحال للتقاعد مفروض اكو منفذ للوصول الهم للاستفادة من خبرتهم العلمية وقت الحاجة لها .!

[فقار الكرخي]

اني اشوف المفروض كلشي مينطوهم .
هاي بالنسبة للموظفين .
زين ليش ؟
يعني هاي الناس كاعدة لا شغل ولا عمل
وانت مبربع بالراتب
وينطوك قطعة ارض
وقروض
وسلف
وعايش احسن عيشة
والناس الباقية مالاكية خبز تاكل

وبعد هذا العمر الشبعت بي رواتب وفلوس
تريد تكعد بالبيت وتاخذ راتب الي هو التقاعد .

راح تكول خدمت الدولة
حبيبي مو بلاش
اشتغلت بفلوسك
عالتبريد وعالتدفئه
والسيارات الحديثة والخطوط


والفقير يشتغل حمال
وجايبها تلزك
ومن يكبر يحدب ضهرة من التعب
ويصير بي اشكال الامراض
بسبب التعب الي جان الموظف نايم بي عالتبريد
وهو مشلوع كلبة
ومحد بحاله



مشكورة كاردي

[Evan]

اعتقد السن التقاعدي شي ضروري لان اكو كفاءات جديده من الشباب يجب ان تظهر يجب ان يكون الهم مكان ودور اكو هواي ناس ماخذه مقاعد وناس تنتظر تقاعدهم حتى ياخذون هل المكان

[Laraa]

مشكلة يا كاردي
شوفي الاراء هنا وطبعًا هذا جزء مصغر من اراء الشارع اللي اعتقد
تتفق مع هذه الاراء ، تره الموظف والاستاذ هم بشر هم انسان وعنده التزامات
وعائلة ويريد يعيشهم ، مثلًا رأي فقار ، يا فقار هذا المواطن اللي تعين وخدم 30 سنة وبيهم اكثر
شنو مامن حقه يعيش بعدها زين شنو ذنبه اذا هو اخذ فرصة وتعين وغيره مماخذ فرصة
هذه الامور ميتحملها المواطن لان هو مثلك ، ثم وين اكو اراضي وسلف !
الاراضي بوقت المرحوم صدام نعم كانت موجودة حاليًا ماكو والسلف الدولة متنطيها ببلاش روح شوف الفوائد اللي تاخذها واذا الموظف صاعد سيارة او بنى بيت فهذا كله بالاقساط

يعني الدولة التعبانة مو بس ولدت بطالة وانما ولدت حقد بين الشعب واحد عينه ع رزق الثاني
بدل ما المواطن يؤيد قانون التقاعد بحجة غيره يلاقي فرصة المفروض يفكر ان هذا البلد ممكن تتنشط بي المصانع وبالتالي تقل البطالة ، بس احنا اسهل شي علينه نلاحق المواطن اللي مثلنا لمجرد محصلنه فرصة

طبعًا اني ضد قانون التقاعد ، الكفاءات الموجودة خسارة كبيرة ان تندثر لمجرد ان الدولة عاجزة على ايجاد سياسة عادلة لتوزيع الوظائف او عاجزة على ايجاد بدائل للتوظيف الحكومي
ثم حتى وان طلعوا تقاعد كل عقلكم راح تتعينون هههههه !!

معلومة بسيطة احب اذكرها للي موموظف ، لتتوقع الموظف مرتاح لمجرد انه يستلم راتب نهاية كل شهر
هذا الموظف مشتعلة صفحته و كل يوم الدولة بقرار جديد يخفض من راتبه سواء كان قرار رفع الضريبة او استقطاع معين او ختى زيادة نسبة التقاعد مثل ما صار من 7‎%‎ الى 10‎%‎ واكو مقترح الضريبة تكون على اساس اجمالي الراتب وليس الراتب الاسمي فقط
تخيل هذا التدريسي اللي ضريبة الدخل حالياً بـ 150 الف شگد حتكون اذا ع اجمالي الراتب !!!!

[العراب ']

آني اشوف التقاعد ارحم بهواي من ذلة الوظيفة
الموظف بالعراق أبداً مامحترم ولا كرامته مصانة مهما كانت وظيفته ،، من رئيس الجمهورية الى ابسط فراش في دوائر الدولة .
اما عن الاستاذ اللي يگول راح يسلبون لقمة عيشي ، فهذا لأن راح يطلع تقاعد بأربع ملايين او خمس ملايين دينار .
ماراح ينقص من راتبه شي غير بس الإشراف على طلبة الدراسات العليا والمحاضرات ،، وهاي بحد ذاتها راتب ثاني .
الفائدة الحقيقية هي ضخ دماء جديدة واستيعاب الطاقات المتخرجة والشباب الجدد ، من اجل تغيير واقع المجتمع وواقع الجامعات وتلك المنظومات المترهلة المسيطرة على العملية التعليمية والتربوية في العراق .

[د. حسن سعيد]

جايكم ان شاء الله باجر لأن ما قاري التعديل مال قانون التقاعد لهسة بسبب الدراسة، بإذن الله أفصخه اليوم وأكتب ردي هنا، بس سمعت أكو تعديل جديد هم رح تدزه الحكومة للبرلمان، صراحة هذا القانون بي مصايب وشخابيط بمعنى الكلمة ، كل هذا والحقد السياسي موجود لأن ما يمس شي من رواتب وامتيازات المسؤولين ولا رواتب رفحاء وعناصر النظام السابق اللي خلصو موازنة الدولة

[الرميثي]

بالنسبة لقانون التقاعد
فانني سوف لن اتكلم به من وجهة نظر قانونية
فهذا ليس من اختصاصي
وانما سوف اعطي رأي شخصي مبني على واقع حال
قانون التقاعد هو اساسا غلط ولايوجد شي اسمه تقاعد بالاسلام
فالانسان خُلق ليعمل وليس ليترك العمل ويسكن البيت
قال رسول الله صل الله عليه واله وسلم
اذا قامت القيامة على احدكم وفي يده فسيلة فليزرعها
فعمل الانسان يستمر الى اخر لحظة في حياته
فكيف اذا امتزجت الخبرة القديمة المتراكمة عند الكبار
بهمة الشباب ونشاط الشباب لبناء الاوطان
لذلك نقول ان قانون التقاعد هو غلط من الاساس
وعلى الدولة ايجاد فرص العمل لجميع افراد المجتمع بما فيهم الكبار والشباب
فهذه مسئولية الدولة بفتح التعيينات وتنشيط القطاع الخاص والعام لكي يستوعب
الايدي العاملة واصحاب الخبرة والشهادات العالية
فالبطالة واعمار الاوطان ليس حلها بأن نرمي الاف الايدي العاملة
واصحاب الخبرة وخصوصا الذين يحملون مؤهلات عالية
في بيوتهم لكي يتم تعيين غيرهم .