هنا

[فقار الكرخي]

مرحبا

نحن ضد غلق المدارس بالاجبار والتهديد
ولنكتفي باعتصام الكليات فقط لانهم لبنة الشباب الواعي القادر على التغيير ...
علمونه انو المدرسة امنه بس ما كالوا هاي الام راح تذبنه بالشارع وتخلينه نبيع كلينس ما كالوا هاي الام راح تخلينه نبيع علاليك !!!
اي تعليم الذي تتحدث عنه تعليم اليابان لو الامارات
شوارع ما عدنة كل يوم طايح طالب بالطين ومتمرغل بالوصخ بسبب المطر ... تعال للبصرة وشوف المطر غرك ساحات المدارس والشوارع المقابيلها اريد اعرف شنو قيمة التعليم اذا وزيره فاسد واساسيات التعليم فاسده ... شنو قيمة والطالب يعبر الشارع بقناطر (يصفط حجار ويعبر عليهن) انا واحد من الناس منعت اخوي يداوم صار يومين شوارع ما عدنة مثل الاوادم مدارس ما عدنة مثل الاوادم رحلات بيها ملفات فساد طباعة الكتب بيها فساد مع هذا لا نتفق مع اغلاق المدارس بل بالتثقيف والتوعية باهمية التكاتف لاجل الوطن

بخصوص اذا كان سلمي كيف يقتل ... انت اجيت للتحرير ببداية اكتور اتحداك توكف مو تشيل علم مثل الارهاب يعتقلوك وتشبع كتل وتالي يحققون وياك وتوقع مذكرة عدم ورقه فارغة .
شي ثاني انت شفت متظاهر رافع سلاح بوجه الحكومة ؟ لو فقط بالعلم وينقتل
لولا اخذ السواتر بالجسور لكانت التحرير الان فارغة
سلاما للمرابطين فيها انا كنت وياهم ايام وشفت شنو معنى الثقافة وحب الوطن ... اذا اتريد تعرف معدن الشخص عاشره مو تسمع عنه
اما بخصوص الاحداث الي جرت ما تكدر تغير من سلمية التحرير وسواتر الجسور ولا تسيء لسمعتهم

اكو مشاركة هنا تكول احنه شعب جبان لو نكدر جان غيرنا النظام بيوم ... طيب تكدر تعبر حواجز القناصين تكدر حضرتك تجبرهم يذبون السلاح حته ندخل للخضراء وتسقطها ؟ انت شفت فقط محاولات اختراق الجسور شكد اخذت ارواح ؟
هيج تشوف التغيير سهل ؟


انا لا احبذ اعتصام المدارس لكن اتفق مع الكليات كونها الشريحة الاساسية بالتغير
سؤال / برايك تكدر تغير بدون اضراب او اعتصام ؟

هو لعد الكليات شنو ؟
غير طلاب
انت منو انطاك الحق تتحدث بأسمهم ؟
الطلاب كاعدين يبجون بس يريدون يداومون

اما المتظاهرين
لو يشلون سلاح اشرف من الي ديسوو البعض
اقلاها طلقة تخترق كبنك المحل وتسكت
مو يشمرون بطل ويحركو

زين تريد تدخل للخضراء بصفتك شنو ؟
هاي الاحزاب الها جمهورها واكو ناس منتخبتها ماجتي من فطر الحايط .
تريد تسقط حكومة الشعب منتخبها
هسة منكول كل الشعب لنفرض ربع الشعب
يعني هم عدهم قاعدة جماهيرية .
زين الخضراء منين تدخللها ؟
من جسر الاحرار اكيد .
شعندك ملثم وشايل موتولوف وواكف يم البنك المركزي ؟

اما سؤالك
اكيد نكدر من خلال صناديق الانتخاب
وننتخب الشخص النزيه .
ومتأكد هم راح يفوزون الاحزاب الفاسدة
والسبب عدهم قاعدة جماهيرية
وانت اكيد متكدر تغير قناعات الناس
بشي انت مقتنع بي .

ونكدر نغير من سلوك الحكومة بالتظاهر السلمي




نورت ابراهيم العزيز

[فقار الكرخي]

كل دول العالم من تصير بيهم كارثة طبيعية أو حروب يوقفون الدوائر والمدارس عن العمل بين ماتنتهي الكارثة. العراق يمر بأكبر كارثة بالتأريخ أخاف محد يدري. عصابة نهبت البلد وطببتله داعش وگامت تگصگص بي واحتمال اذا بقت هاي العصابة فد سنة حتى ميناء الفاو يبيعوا للكويت.
احد الاخوة يگول محد يعرف معنى نريد وطن. اخي الناس من صاحت إيران برا برا ومن اتهمت الطبقة السياسية بالتآمر على العراق يعني مو غشمه يعرفون بأن البلد باقي اله كم شهر ويضيع نهائيا
ترا حتى المرجعية ويا المتظاهرين وحقوق الناس المسلوبة اذن هي جاي تمشي شرعا وقانونا
ليش هذا الاحباط وهذا التشويه للناس الفقره الطالعين يطالبون بحقوقهم

هي الكارثة وينها ؟
دوام كلية او مدرسة شنو يأثر
احنة ليش بكيفنة نسوي الوضع سوداوي
يعني عصابة نهبت البلد نبطل منداوم ؟
يا اخي لاتصدك اكو انسان شريف
ضد المظاهرات كون على ثقة
احنه دنحجي عن الأمور السلبية
الي منها اجبار الطلبة على ترك مدارسهم بالقوة والتهديد

هاي المظاهرات اذا انتهت
راح ترجع الاحزاب تسرق وتنهب بقوة
لهذا احنة نتمنى ونطالب بسلمية المظاهرات

[محمد صبيح]

اذا كان ثمن التخلص من الاحزاب سنة دراسية من النوع الفاشل وحسب رأي الجميع قبل الثورة فلا بأس
ممممم اذكرك فقار بالاساتذة في الكليات والمساومات لو نسد الموضوع هسه!
لو بيدي عامة الدوائر امنعها.. نحن اسرى ولانقاش في ذلك
بوساتي

[الملاذ الاخير]

فقار كلامة منطقي .. شلون نسقط حكومة الها قاعدة جماهيرية ..
وهذا اللي كلته سابقاً .. الشعب مفكك ..

يا اخوان اذا ماتتوحد كلمتنا ونصير ايد وحدة بعيداً عن المسميات والاطياف والمذاهب راح تنتهي ثورتنا بفشل ذريع
واذا فشلت الثورة .. مثل مايگول ابو فطم ( الك الله ياعراق ).

[فقار الكرخي]

اذا كان ثمن التخلص من الاحزاب سنة دراسية من النوع الفاشل وحسب رأي الجميع قبل الثورة فلا بأس
ممممم اذكرك فقار بالاساتذة في الكليات والمساومات لو نسد الموضوع هسه!
لو بيدي عامة الدوائر امنعها.. نحن اسرى ولانقاش في ذلك
بوساتي

الاحزاب الها قاعدة جماهيرية
واذا اني وانت منريدها اكو غيرنا يريدها .

زين اني ك طالب ما اقبل واحد يضحي بمستقبلي حتى وان كان مستقبل مظلم
اني اريد احدد مصيري واتحمل النتائج .
اما المساومات اكيد موجودة
بس خما كلها . اكيد قلة قليلة ضعيفة الانفس تمارس هاي الممارسات
يعني احنة صرنه مثل الماركسيين
نطالب بالعدالة
نودي الأعور للدكتور نكلة عين يشوف بيها وعين ميشوف بيها
ولمن يعجز الدكتور عن اصلاح العين العورة
يفكسلة العين الصاحية
تكلة ليش يكلك حتى تصير اكو عدالة
ميصير وحدة مفتحة ووحدة مغمضة
وبمناسبة التعليم الفاشل
اتحدى اي طالب كلية يكدر يحل كم مسألة
من كتاب الرياضيات لطلاب الخامس ابتدائي


هذا مينفي فساد الدولة
وسرقاتهم
زين ليش ما نضحي بسواق السيارات ؟
منخلي سيارة تمشي بالشارع وتنشل حركة الناس والدولة ويصير النريدة ؟
ليش نروح عالطلبة
السبب يشبع كتل اليندك بسايق تكسي
او سايق تريلة محد يكدرلهم
بس نجي عالطلاب على كد الايد




ابو جاسم الذهب
نورت الكون يالغالي

[الملاذ الاخير]

اذا كان ثمن التخلص من الاحزاب سنة دراسية من النوع الفاشل وحسب رأي الجميع قبل الثورة فلا بأس
ممممم اذكرك فقار بالاساتذة في الكليات والمساومات لو نسد الموضوع هسه!
لو بيدي عامة الدوائر امنعها.. نحن اسرى ولانقاش في ذلك
بوساتي

احسنت استاذ شنو قيمة السنة .. فدوة لتراب العراق
بس غير كون نغيير شي من الحكومة نحو الافضل .. غير نتخلص من الحزاب الفاسدة !؟
سوالف الكليات والمساوات ووضعيتهم التعبانة هسة احنا حالياً بغنة عنها ..
لان اذا فسد الراعي فسدت الرعية كلها ..
اذا كان رب البيت بالدف ناقرُ .. فما شيمة اهل الدار غير العود والطربِ

خوية مشكلتنا اكبر من ما نتوقع ..
مثل واحد يريد يگص راسه ؟
شلون نتخلص من الاحزاب السياسية ونص الشعب مؤيد لها ومنتمي الها ..
واكو بعض الناس يحبون بعض الاشخاص رؤساء الاحزاب اكثر من مايحبون ربهم اللي خلقهم ..!
واذا تگله هذا الشخص اللي جاي اتبعه على باطل او خطأ مستعد يقتلك ويكفرك ويطلعك من المشركين .

[فقار الكرخي]

فقار كلامة منطقي .. شلون نسقط حكومة الها قاعدة جماهيرية ..
وهذا اللي كلته سابقاً .. الشعب مفكك ..

يا اخوان اذا ماتتوحد كلمتنا ونصير ايد وحدة بعيداً عن المسميات والاطياف والمذاهب راح تنتهي ثورتنا بفشل ذريع
واذا فشلت الثورة .. مثل مايگول ابو فطم ( الك الله ياعراق ).

بالبداية اجوي رادو ينصبون منصة بالتحرير
جماعة ساسوكي
كامو المتظاهرين يصيحون
لا مقتدى ولا هادي
سرقتو خير بلادي

وطردوهم

وراها راح ساسوكي بسيارتة بالنجف
ودخل بنص المتظاهرين
وشفت بيش ضربة ؟
وطفر
وضلو يحاولون الى ان سرقوها .

وانشاء الله تصير عليهم انتفاضة
ونسترجع المظاهرات الي شفناها بالبداية



نورت ابو شهاب

[د. حسن سعيد]

من أدخل الدواعش إلى سوريا أولا هم تركيا وبأموال مدفوعة من قطر بناءا على اتفاق مع إيران لإنقاذ حكم بشار الأسد وقد نقلهم حزب الله من عرسال إلى البو كمال وفتح لهم الطريق إلى العراق هو نوري المالكي بعد هروب غيدان وگمبر ولاتنسى ان رؤوس القاعدة ومنهم حمزة بن لادن هم لاجئين في إيران..
قصدي هاي مؤامرة كبيرة لايعرف مداها الا الله تعالى
والكل مشترك ومتآمر بها ضد العراق ولحلب العراق
انا ضد الكل سواء سعودية وسواء إيران وأمريكا على مود ماتزعل
ليش بحرب ٢٠٠٣ الدوام والمدارس مو تعطلت لو لا
واذا انتو عايشين ابغداد وعاجبكم مول المنصور والحارثية حسبالكم هو هذا العراق فأرجوكم تعالوا لمحافظاتنا الجنوبية مثل مناطق هنود الحمر قبل ٢٠٠ سنة احنا وجهالنا كاتلنا الظيم وثانيا شعندك انته على مود اتداوم عندك مصانع مثلا لو من تتخرج راح تتعين وتفيد الوطن
وشي ثاني لتضلون تنگون براس المظاهرات بس اصبروا شوية لأن الضغط جاب نتيجة وان شاء الله الخير جايكم بس اصبروا ورابطوا مع اخوتكم

وعينِ أبيكَ إنَّكَ لملبوسٌ عليك، يا خوية أول شي سالفة داعش ونقل حزب الله عناصرهم من عرسال الى البو كمال صارت بعد سقوط الموصل بسنتين، الشغلة من 2009 واحنة ننبه بشار الى وجود القاعدة على أراضيه ونطالبه بتسليمهم بس ما كان يقبل لحد ما انقلبو عليه، بعدين يا أخي ليش تكول عني (حتى لتزعل) ترة داعيك عراقي ابن موسى الكاظم فمو معناه اذا طلبت الحق وكلت لازم ننتقد الكل مو بس ايران سويتني أزعل، نقطة أخرى فدوة لعينك ترة أهل بغداد هم مثلكم لتتصورها جنة ولا عبالك كلنا مخلصيها بالمولات تعال أشوفك شوارع منطقتي (الحرية) وآخذك لشعلة وللثورة (مدينة الصدر حالياً) هم مثلكم فما لها علاقة سكني ببغداد بالحث على ترك الاضراب.
بحرب 2003 تدري التعليم توقف كم يوم؟ آني أجاوبك شهر ونص وبسبب الاحتلال الأمريكي ولأنها أزمة حرب ، مو مثل هسة ماكو شي الحمد لله ، بعدين ولد الموصل من احتلّوهم داعش أشو ظلّو يداومون ما كعدو بالبيت بحجة أزمة ومدري أيش؟ زين ليش الاضراب بس بالجنوب ؟ ليش مو بباقي المناطق؟ تكدر تجاوب؟
أما ليش آني أداوم فيا أخي صح ما عندي مصانع ولا فرص عمل ولا ... بس أسألك سؤال وأريد جواب موضوعي مو عاطفي: اذا الله وفقنا ونجحت الانتفاضة وشلعنا هالمجرمين منو يقود الدولة؟ اذا ماكو كفاءات شلون نتقدم؟ يعني هَم راح نجيب جهلة متخلفين يصعدون ونرجع للمربع الأول. بعدين اليابان ما كان عدهم مصانع صالحة بعد الحرب العالمية الثانية وانضربو قنبلتين نوويتين أشو ظلو يدرسون ليش ما كعدو؟ واليمن تحت القصف السعودي الخليجي وسوريا مشتعلة بنيران الحروب وهم ديداومون؟ يعني بس العراق أزمته بركانية ماكو مثلها بالعالم؟! صراحة جوابك غير منطقي آسف.
أما سالفة النك فما نكّيت على أحد بس هاي حرية شخصية واذا انت تكول آني ضد الدكتاتورية فمثل ما انت من حقك تتظاهر من حقي أدرس وأتعلم لا أجبرك ولا تجبرني.
وبخصوص الخير اللي جاينة لهسة ما معلوم بس أنصحك بقراءة كتاب اسمه (أحجار على رقع الشطرنج) حتى تعرف شلون يتحرك العالم، هذا مع الإقرار بأن هناك أبطال فعلاً يقدمون كل شيء لكن هل سينجحون ؟ الله أعلم

[رمـْـْْـْــــــــآڊ]

....
هنيالنه بهيج تعليم ... اصلا دخلت وطلعت ما اقرة انكليزي منو سبب هل الشي انا لو العملية التربوية الخرجتني الي تدافعون عنها ؟

[M̲u̲S̲h̲T̲a̲Q̲ツ]

مرحبا عزيزي

شوف عيني ،،، اكو مثل يگلك حرامي لتصير من سلطان لتخاف
اعتقد وصل المغزى
الموجودين بساحات التظاهر ليس اجمعهم ولا الغالبيه العظمى ع حق او واعيه ومثقفه وتريد وطن
اجيك لتستعجل (اقصد الي ديقرء ردي )
روح للساحات تلكة خيم اعتصامات تابعه لاحزاب واكثر من حزب بمسميات مختلفه لكن الجوهر واحد
كما يقال وجهان لعمله واحده
ايضا تجد العصابات والشقاوات هناك ولا يجيني واحد يكولي ذولي وطنين اكثر منك ،،، لا عيني ذولي
مكيفين ع الوضعيه ومستغلينها
اما السلمين فاعدادهم محصوره وعندما تجالسهم هناك تعرفهم بخلقهم واخلاقهم
طيب تجي تكلي ديعتدون علينا ودندافع عن نفسنا ،،، اذن خرجت عن السلميه ام انا مخطئ
حاول تنصح واحد كوله لتحرف بالشارع لانه يتلف ،، يطلع لسانه مترين عليك وابسط ذريعه جاهزه ،،، من سقط
الشهداء محجيتو بس من يتلف الشارع
ياخي مو من تخرب وتتلف دوائر وكتب ومستندات حتستغلها الاحزاب اكثر مما تستفيد انت بطرق مختلفه
اما من يهدد مدراء المدارس والعمادات وغيرها فهم عصابات ايا كانت انتماءاتهم لاحزاب او وطنين لافرق بينهم
لانه هذا شغل عصابات
واصبحت التصفيات على مجرد اختلاف بالراي وليجي واحد يكولي ماكو هيج حجي ،،، لا اكو
صدقتم ام لا مو كل الي ينقتلون او يختطفون ،، يكون القاتل والخاطف تابع لجهة لانه الامر اصبح يسير بغياب هيبة
الدوله ،،،ومن امن العقاب ساء الادب وعاد شلون هيبة جانت الها
مجرد اختلف معك بالراي اصفيك افضل ما اخليك تاثر ع الاخرين وتوعيهم
الكلام كثير حاليا اكتفيت
اعتقد نحن ع موعد لانفجار الوضع قريبا