هنا

[فقار الكرخي]

اندگ الباب
وصحت اتفضل
متعود ما ارد الجاي

متعودين نحط العدنه
لو ما نملك غير الماي

وخطاري بهاليلة الگشرة
كاتم صوت

وسلاحه بنص گصتي ويضحك
بين عيونه ملك الموت

لحظات اتذكر اي ذكرى
اي متاع بهاي الرحلة

صوت امي الماتت من مده
چان بذاني

اول لحظة من اتخرجنا
والچكليت الطشته ولموه صحباني

وحسيت بدمعتها بخدي
يمكن حست هذا الموت

انه اتذكر
كل ذكرى تمر يعلى الصوت

وابالي مواعد چم صاحب
باچر ما يمكن نتلاگى

باچر مو وحدي بنص ربعي
يشيلوني وللبيت نفوت

وما ادري شجاب بهاللحظة ست ايمان
وحسرتها من تسولف عن غراب الموت الما عطشان

مسكينه ما شافت عيد
مكتول الها ثلاث اخوان

چانت تلبس نيلي واسود
ما لبست فد مرة الوان

ما اريد اذكر ست ايمان

خلي اتذكر اي شي ثاني
ما ضلت من عمري ثواني

هاي الرحلة يجوز تطول محتاج اخذ اي متاع
واتذكر من اول مرة فطر بالبيت النعناع

گال الفلاح تغرگونه بنص الماي
كل مرة نعوفه وما ندري
وگال نزرعه مو بفياي

كل مرة من نزرعه يموت
بس ما شيعته بتابوت

تتشابه حالي و احواله
ما متعني
بجدامه الموت اتعناله

وين نسولف
خل نرجع نتذكر اي شي

والخطار شلون يتاني ؟
ما تاناني

ما لحگت اتذكر گلبي
من حب وتاه من الحيرة

چنت صغير
وليلية ابچي
وافتر وما تگضي الديرة

ضاع هواي وناسي هواي
وشرد اتذكر وهنه هواي

اول عصفور الموتته وانه صغير
كل ذنبه مگصص جنحينه وما يگدر من ايدي يطير

لو اتذكر من فاض الشط ودمعاتي
من چنت اسمع لام كلثوم

لو من اشتاگ واتسودن
من ما اشوفك واسمع صوتك ويمر يوم

نرجع للخطار اليركض ع السيارة
وانه لهسه ما واصل للگاع وطايح

ما بيه اطمنهم عني
يبدي الصايح

صوتي مچتف ما يطلع لو حاولت اصرخ
والتمو كلهم يبچون

ما غثوني بگد ما غثني ابن الجيران
هذا الساقط سد اخر باب اعله الدنيا
غمض عيني وضل يتشاهد

غمض عيني وما بيه افتحها اخر مرة

ضليت اسمع بس ما اشوف
بردت رجليه من الخوف

للمستشفى
واحد صاح

واخذوني بسرعة واسمعهم
واحد حاچه الثاني يگله ياهو لأهله بعد عيونه ؟

ياهو لأهلي ؟
يعني بعد ما ارجع لاهلي ؟

اول مرة احس بالميت لازم يرجع
لازم ياخذ من صور اهله يضم بعيونه قبل لا يطلع

واخر صفنه
ليش نموت ؟

ونفسه الغثني اول مرة
قاطع هاي الصفنة وغثني من گلهم جيبو التابوت










مرتضى_الحمد

[صفاء العامري]

جميل جدا
اشكرك فقار حبيبي

[انثى مخمليةة]

عاشت ايدك