عروس الماي
لهبش الروح جيده عليك تهبيش
أولَفك گلبي ولراويك الخرابيش
عهد لزهگ وورج الناس والناس
طبع بيها وتكيف عل الخراخيش
نثرت الحلم صدفه بأول الليل
وسگيته من السهر وتأمل يعيش
ويرد بيه الوكت وعليمن يعود
إذا لطيش قصده شباقي بالطيش
وأذا قل السعر وتبور الألوان
بعد محد يگلك عالسعر بيش
أدگ ولطم جذب من يسوه الدموع
ولا أملش بعد بالرأس تمليش
ولا إبني عله ساس يضيع الشوف
ال بنه بتالي العمر شيفيده تفليش
عروس الماي تفتر والبلم جاي
لَون غط البلم مايحصّل الگيش
خرز سبحه شكثر تتحابب آمرار
لجن سجن الخرز تصفه الكراكيش
حَدر مهدك أبيت بعض الآيات
وصفيت الضم گلايد بالخراطيش
وأفصلك هدوم بشحة الأقماش
ويلوگ آعليك يالون الدشاديش
وأشد أحزام واغبش گبل الأذان
ولامحتاج عونه إمن الحواشيش
الأفلي يصير خايب والهرش زين
إذا بجفوف سمره يصحله تربيش
البير يموت غفله أتشيعه الأسرار
بس بشرط واحد لوكو توبيش
عرفتك ما تدوم ودايم أتگول
من يومك الهجرك عينك أتشيش
يَطير شمالك أهجع وأستجن عاد
الفخر كل الفخر لطرافك الريش
الجرح يكبر يغاتي أتيهه الأيام
لجن حجي الشماته لهسه تشويش
جمر وآتگلب إمن الشوگ عالنار
أحومر وبخت حضن المناگيش
مَنه الخرده التصح بجيوب الاثگال
ولا عايش جبتها إعلى البخاشيش
إذا طگيت أنبت والهوى أشكال
فزع طولي وعكس گصر الحرافيش
تقاليدك ممله أتشتت البال
ويهد بالحيل تقليد الدراويش
حليبك ياحليب إمنين مرضوع
أظن مرضوع من صدر الخفافيش
اللثگه أتظل أثر عد كل الأجيال
وهذا الجيل طبعه أطباع تنبيش
همام الزغيبي
رد مع اقتباس
