ابشرك ياوطن ابنك ولاه العوز ..
وعلى اطفاله الفقر هم حد سجاجينة
كضينة اعمارنا باهاتنا وحسرات ..
ومن جلمت صبر يا وطن ملينة
شتريناك بثمن حتى اغلى من الروح ..
وتوقيع الملك بدمانة خطينة
اشو كل الحكمنا راح اسوي عمار ..
وارقى من دبي واجمل بعد زينة
وتاليها يبوك فوسنا ودمنا ..
ويزيد الطين بلة فوك هالطينة
هواي سنين مرت نسمع بتغيير ..
وابد محد تغير بس مأسينة
يومية مصيبة وبعبع يصنعون ..
وعلى ولدك نذر كل واحد سنينة
بطلنا الحلم والترف والتغيير ..
منريد غيرك ياوطن لينة
نريدك سالم واكف بوجه الريح ..
وبيدك تلتفت تمسح بواجينة
يا راية خلود شما تمر ازمان
يا فرحة اهلنا وكل امانينة ..
يا فرحة اهلنا وكل امانينة ..
بقلمي
أحمد الگرعاوي
28/11/2019
رد مع اقتباس
المشاركة الأصلية كتبت بواسطة ᓆjgᓄ⍺
