هنا

[الملاذ الاخير]

شكرا لسعة صدرك

تسلملي صديقي

[فضاء.]

صباح الخير

-أحمد شنو تشتغل حاليا؟
-شنو أمنيتك بهل حياة؟
-شنو أكثر شي يخوفك؟
-هم خطرت ابالك فكرة الهجرة لغير بلد؟ وإذا خطرتلك شنو المنعك منها؟

-تقبل الانتقاد من الآخرين سواء كان نقد بناء أو لا؟
-عندك شخص تلجأله ب الأوقات الصعبه؟
-انت شخص استبدادي؟

[فقار الكرخي]

احم احم

رجعتلك بكم سؤال


1 . ماذا تعني لك الأم

2 . تعرف تذبح طلي وتكصبة

3 . انت تكول مخلص ماستر
بس من اجي اشوف ردودك الكاها
مليانة اخطاء املائية ؟
شنو مشكلتك

4 . قدم نصيحةل

السلطانه
اموري
العراب
سوسن محمود

5 . احجيلي عن تفاصيل يومك
شلون تخلصه

6 . بأعتبارك تحب الدين
وعندك معلومات عن اهل البيت
واشوفك تكتب اشعار الهم .
تكدر تعددلي انجازات الأمام الكاظم عليه السلام

7 . شي سويتة وندمت عليه شنو

8 . برأيك المنتدى شناقصه

9 . اكبر صدمة تعرضتلها بحياتك عن شنو جانت

10 . اكبر سورة قرأنية حافظها عالغيب شنو




واكتفي بهذا القدر

[★彡جنح فطرس 彡★™]

نورت حمودي ان شاء الله مرتاح بالكرسي

[رمـْـْْـْــــــــآڊ]

مساء الخير ... احمد

1. اذا وحدة من الدرريات كالتلك احبك تصدكها يعني اكو هيج شي حب عن طريق التواصل ؟
2. اغلب النشطين بمواقع التواصل يحبون يتصنعون بشخصياتهم انت واحد منهم لو لا ؟ وشنو السبب
3. يمته الانسان يتخله عن مبادئه ؟
4. لو شتمتك بنص الشارع شتسويلي ؟
5. كلمتك مسموعة بالبيت ؟
6. هم جربت شعور الذنب ؟ وصفه اذا اي
7. انت تجامل المقابل لو صريح ؟
8. برايك الي اتثق بالمقابل وتدزلة صورتها على نيتها لو غبية ؟
9. لو طلبت منك تغير اسمي شنو تسميني ؟

[الملاذ الاخير]

صباح الخير
مساء الورد .. اهلاً فضاء
-أحمد شنو تشتغل حاليا؟
اشتغل محاسب بمختبر تخصصي للتحليلات المرضية .
-شنو أمنيتك بهل حياة؟
ما اشوف احد محتاج .
-شنو أكثر شي يخوفك؟
هواي شغلات اخاف منها ..
غضب الرب
الحساب
فقدان الاعزة
المصير
-هم خطرت ابالك فكرة الهجرة لغير بلد؟ وإذا خطرتلك شنو المنعك منها؟
هواي خطرت ابالي وتمنيتها في البداية .. بس بعدين امتنعت ..
ولايتنا برغم صغرها لكنها وطن ..
-تقبل الانتقاد من الآخرين سواء كان نقد بناء أو لا؟
اتقبل وبكل رحابة صدر ..
الامام علي عليه افضل الصلاة والسلام يكول :
رحم الله امرءاً اهدى الي عيوبي .
-عندك شخص تلجأله ب الأوقات الصعبه؟
جان عندي اصدقاء اسولفلهم .. بس الوقت يبين كل شخص على حقيقته ونصدمت ..
اخوي الازغر مني فقط .. ماعندي ثقة بغيره بعد ..
-انت شخص استبدادي؟

لا بالعكس فري دائماً ..


يسلموا للاسئلة الحلوة فضاء

[الملاذ الاخير]

احم احم

رجعتلك بكم سؤال


1 . ماذا تعني لك الأم
الاوكسجين .. وبدونه ماكو حياة ..
2 . تعرف تذبح طلي وتكصبة
اعرف لان اخوتي اثنين كصاصيب .. بس ماذابح قبل ابد ..
3 . انت تكول مخلص ماستر
بس من اجي اشوف ردودك الكاها
مليانة اخطاء املائية ؟
شنو مشكلتك
اولاً الماستر مالتي مو لغة عربية اني اقتصادي مالي ..
وثانياً اني مسولف لبعض الاعضاء سبب اخطائي الاملائية هي سرعة كتابتي والكيبورد يكوم يمسلت حشاك ..
ورغم هذا اني عندي اخطاء املائية فعلاً ..
4 . قدم نصيحةل

السلطانه ..
اموري ..
العراب
سوسن محمود
اخر مرة قدمت نصيحة ندمت من وراها .. واقسمت بعد ما انصح اي شخص .

5 . احجيلي عن تفاصيل يومك
شلون تخلصه
يومي ممل جداً .. بالليل ع النت .. والصبح مرات اتاخر ابقى نايم لو عندي شغل اطلع اجيب مسواك
او اروح اشتري ملابس .. مرات زيارة ومرات للجامعة
والعصر بالشغل بالمختبر .
6 . بأعتبارك تحب الدين
وعندك معلومات عن اهل البيت
واشوفك تكتب اشعار الهم .
تكدر تعددلي انجازات الأمام الكاظم عليه السلام
اكدر هسة اجيبلكياهن من النت واخليهن .. بس راح اجذب عليك
اني ماعندي هاي المعرفة الموسعة .. يرادلها واحد دارس بالتفصيل
ترة اغلب معلوماتي الدينية عن طريق التلفزيون .. وجنت حاير بدراستي ..
يعني عن طريق اللي اسمعة من الخطباء بالاذاعات ..
7 . شي سويتة وندمت عليه شنو ؟
فرص ذهبية ضيعتها :
1- ظابط مخابرات .
2- ظابط طيران .
ما احب ان اكون منتسب بالجيش والشرطة .
8 . برأيك المنتدى شناقصه ؟
ناقصة روحه .. ناقصة هواي شغلات ..
9 . اكبر صدمة تعرضتلها بحياتك عن شنو جانت
وفاة والدي .. اني بالخط كاعد وخابرني اخوي ..
افترت الدنيا .. اول مرة احس بهيج شعور ..
جانت عندي قصملة اريد اعرف البسها ما اعرف . ..
10 . اكبر سورة قرأنية حافظها عالغيب شنو
يس .
ويوسف والكهف .. بس مو مظبوط 100‎%‎.
دائماً اسال الله عز وجل يوفقني لحفظة وتفسيره .


واكتفي بهذا القدر

تدلل فقوري الغالي ..

[الملاذ الاخير]

مساء الخير ... احمد

1. اذا وحدة من الدرريات كالتلك احبك تصدكها يعني اكو هيج شي حب عن طريق التواصل ؟
لا اكيد .. ماكو حب ابداً ..
واللي يعتقد كلامي خطأ هسة .. تثبتله الايام صحة كلامي .
2. اغلب النشطين بمواقع التواصل يحبون يتصنعون بشخصياتهم انت واحد منهم لو لا ؟ وشنو السبب
اني هاي طبيعتي او بالواقع فري احسن من هنااا .. لان هناا احاول ابتعد شوية لان مو الكل نفس الثقافة والادراك
يعني مرات تسولفلك سالفة يجيك واحد يفشلك او يسمعك حجاية تغثك .. واني ما احب ازعل شخص ابداً مهما يكون ..
3. يمته الانسان يتخله عن مبادئه ؟
من تنتهك حرمته .. ويضيع حقه ..
بعد شعنده باقي متمسك بمبادئه .
4. لو شتمتك بنص الشارع شتسويلي ؟
اسالك شنو السبب اذا غلطان بحقك اني .. فاعتذر منك
واذا ما غلطان ادير وجهي وامشي .
5. كلمتك مسموعة بالبيت ؟
الحمد لله مسموعة بلينها مو بقسوتها ..
6. هم جربت شعور الذنب ؟ وصفه اذا اي
مراراً .. مايوصف !!!
7. انت تجامل المقابل لو صريح ؟
صريح اغلب الاوقات .. بس مرات تظطر تجامل على حساب سعادة المقابل .
8. برايك الي اتثق بالمقابل وتدزلة صورتها على نيتها لو غبية ؟
تعتمد على العلاقة والشخص الداخل وياه العلاقة ..
ولو بالغالب ع الثقة بين الطرفين ..
وحتى على نيتها لو غبية تعتمد ع الشخصية ..
9. لو طلبت منك تغير اسمي شنو تسميني ؟

يرادلها صفنة واستكان جاي
انتة شخصية حلوة ابراهيم .. ومايلوكلك غير الحلو ..

تسلملي ع الاسئلة الجميلة

[الملاذ الاخير]

نورت حمودي نشاء الله مرتاح بالكرسي

فهودي الورد .. مشتاقلك حبيبي
النور نورك

[عدنان الواثق]

نورت استاد احمد وبصفتك ماستر أقتصادي برأيك شنو اهم خطوه لازم اصحاب القرار يسووها ويتعافى البلد وينتعش اقتصاديا غير الامور السياسيه ولنفرض الان يقدم عليها ابو العداله وعلى الأغلب اساسها علمي ..اكرر ترحيبي بقدومك واتفضل أستاذنا