حبيبي لا تگلي في أمان الله
انا الليلة غريب اطوار
كلشي البية يتحسر
كلشي البية يجبرني اگلك لا،
اگلك لا لتتعذر
تعال وياي نادمني بمزاحك مثل ما يرضيك
واگلك ريحتني ومنك اتشكر
تزعل،
ترضى،
تدلل،
تسكت،
تبجي تتحجر
انا بأي كآس منك أنتشي واخدر
كلشي ولاتگلي في أمان الله
كلشي ولاتحاول مني تتعذر
انا عن طيب خاطر
راخصك تلجمني بس بهداي،
بس بهداي
لأن گلبي جرح اخضر
وروحي مراية من النظر تتكسر
احفرني سواجي ولاتعطشني
اشتلني گزاز، گزاز ولاتعطشني
انا گلبي حلو المعشر
انا طيني حلو بالعطش يتفطر
تعال وياي انا محتاجك الليلة
ومحتاج الگمر يسهر
تعال وياي،
اريد انكت الراس من السكِر
واتأمل بوجهك
اشوفك زين، بلكت اصحى واتذكر
شلون وليش حبيتك
شنو المنك عجبني بگلبي ضميتك
واريد اعرف شگتلك وشگلتلي
والعشگ خَضّر
وبعد مدري شيدور بخاطري
ساعدني اتذكر
وإذا گلبك مثل گلبي
وجه غربيل مو دفتر
نسيني بسكوت المستحة والخوف
حتى اخدر
نسيني بعد اكثر
إخذني من الخدر للسكِر
حتى اسكر
والأحسن من هذيج وهاي
اخذني وياك، اخذني وياك لو تگدر
رد مع اقتباس