هنا

[فقار الكرخي]

گمت امن اريد احلف( وحگ عيونك)
لخاطرهن يچذبوني ويصدگونك..!!

امن اتعب واجيك امن الگمر حد الگاع
واجزع واطيحن دمعه فوگ متونك..

لوثگل دنيه بوجهي يمك ينزاح!!
بس تضحك بوجهي وتگلي شلونك..

هيه المعزه امن الله مو حچيي لسان
كون اليحبك يعرگ بكانونك..!!

يارزق غبشه وياطعم اول فال
استفتاح خير الوادم يسمونك..

يابلبل الغبشه وصباح العصفور!!
يخويط شمس و كلهم يتانونك..

ياطوس حِنه بحِنة مدلل حيل
كل الخناصر تحلم يلمسونك..

ياگذلة آحديثه وهوى يشاقي زلوف
ينضاگ صوتك بي طعم زيتونك..

ماعون ويهك ترسه مالذه وطاب
كل الفواكه حطهن بماعونك..

من وجهك لزلفك لحد فطر الزيج
توت وكرز واعناب ترس غصونك..

جوز الشمال بخدك شگد بلوط؟؟
تكتل جبالك تسبي الايشوفونك

ياانعم امن السمسم وطولك ماي
تتمزرگ امن چفوف الايكضونك

ياچلمة الله يساعدك للچادود!!
يافَيّ رَطِب بالذروه يتعنونك..

يالضحكتك عفية معلمه لتلميذ!!
الطلاب كلهم عفيه يتمنونك..

طلسم گفاك ومگبلك كون حروز
جِن النبي إسليمان ميفسرونك

بكل بيت اشوفك خضرمه ام سبع عيون
تطرد الشر الناس يعتقدونك

مثل العطر لمن يچلب بهدوم
عرفوني احبك گاموا يشمونك









لــ نبيل الخفاجي....

[انثى مخمليةة]

عاشت ايدك

[فقار الكرخي]

نورتي يالغالية