آنه وجروحي وسماري
آنه وجروحي وسماري
ابغربه وغروب وغريب....!!
اتلفني صفنات المحطه
الصفنه غير الذكرى والدمعه اشتجيب؟
وكل وطن مزروع وحشه
الليل موش الليل.. ليل الوطن ذيب
وحته الولايه ال تنور
اشما تنور الشوف ظلمه
وطافيه ابعين الغريب...!
وكل شي بيّه ايصيح مامش...!!
آنه...صوت وصوره عايش
ليش عايش...؟؟
ليش مامش...؟؟
ليش بيّه الصوت سكته...؟
وكل حلم بعيوني طايش..؟
چي عتگ ثوب المشاعر ؟
چي گطع همسه النده وماودّه طارش ؟
آنه....والبيّه....وسماري !!
وليل مالفني ابعباته
وكل درب مايشتريك....الخطوه ذله
واليذل ترخص غلاته...!!
الصفنه خمره..!!
وجرحي ماكمّل صلاته
والگمر... لو فطن حسنه
يبدي ياكل من حلاته...
وانه مثل الكمر طافي...!!
وماكو طيف ايسامر اعيون المرافي!!
أو لاعرس سمره ونقش حنّه وچفافي
ولله ملّتني الشوارع
مبحر ابمركب صفنتي
وسوله بيّه !!
أحسِب ابيوت وجوامع..!!
وقره بعيون التصدلي
ابكل وكاحه اتگول : ضايع !!
هذا ضايع....!
آنه ضايع
ياندامه....وريج حنظل..!!
غافي عمرين اعله ريجه
وسولفت وي روحي سالوفه عتيجه
وفزّن ابحظني الطواري
وشبّت ابروحي الحريجه
وختلفنه...
الليل...... وجروحي...... وصفنتي
وكلمن اتعدّه ابطريجه...
وكلمن اتعدّه ابطريجه..
كاظم العطشان
رد مع اقتباس