هنا

[فقار الكرخي]

مو عورة صوتج ثورة احيود
بيهه النخل للماي جادود
غني يبعد اهلي الرشك عود
گمطي الهوة من ماي الاركاب
فزعت بنات الوطن ثوار
ومن التراجي تجدح النار
يسابگن عالموت خطار
ومكياجهن دخان وتراب
ثارن نشامة وسرجن الريح
أبنيات فدعة اليوكع يصيح
تعيش البلابل والمراجيج
وتسقط كراسيهم والأحزاب
وية الرصاص وغبشت الحيل
ركضن شمس بين المجاتيل
وهلهولة سمرة مطرزه بهيل
توزع وطن بعيون الأحباب
كل نثية سمفونيه للدم
بيهه الحزن والفرح غيم
الدين بضفايرهن تيمم
صلة خبز والكذل محراب
عشتار غنت والدمع سال
من عينهه لعين السما هلال
حديثة وزلفهه بالف رجال
لبست قميص الطايح احجاب
حلوات رغم القمع والموت
ورغم النشاز وخنكة الصوت
شفت العراق بجفهن ابتوت
وحنه وترافة وغنه وزرياب
من زيجج تحج العصافير
من ماي گصتج يشرب الطير
باسمج هتف صوت الطباشير
ثورت صداريهن وطن شاب







علي الركابي

[أستثنـآئيـّةة❤️]

عاشت ايدك فقار