انه المهدور صوته بديرة صياح
وخلص عمري رسالة بضرف قاسي

ناي بحلگ فقرة وماصرت بوق
ولا بفلوسهم حركوا احساسي

اسكت..والعراقي بداخلي يصيح
وأهب ثورة خضار بكل حماسي

مو شيطان يدخل بين الاثنين
كل ثنين ثالثهم سياسي

بالخارج ولدهم مايعطلون
عله اخوتي تعطل العام الدراسي

يحطمون السمه بكل قنبلة غاز
وصبرنا يحطم الرقم القياسي

لحذاء اصغر شهيد بذول السباع
فدوه يروح كل موكب رئاسي

وآنه الخشمه يابس عالسلاطين
وترف مثل الگطن بچفوف ناسي

لصير (احمر) ورد يم اليحبون
ودم سنون يم أهل الكراسي

ارفع رجلي يم الاحزاب الكبار
وودي البسها لكن موقياسي

سعف جفي وشلت حمل الوطن نار
وگبل عائلتي خليته الأساسي

افز ودمي يرگص بالشرايين
وأشم تراب گاعه بكل حواسي

وأضمه بروحي من عين اليحسدون
ضمة اسم امي من الجناسي

انه الماعندة (خط احمر)ولا تاج
بس اسم (العراق) التاج راسي










سيف الحلفي