محل يعگاب وكتك والشكاير بور
والناعور يصفر والدلو خالي
عطش وأتله المواسم صوهد بتشرين
لابشر بديم ولا نحر چالي
زيزاية حَماد وشح عليها الغيم
چا شلحگ عليها شينفع وشالي
بتبنها ولا توفي ولا تسد طَلاب
حاصل ما أريدن بس ستر حالي
وتعللي ونوالك مثل وسط سهيل
يبطي سهيل وآنا بحضن چتالي
نوالك چود منحر والوكت حدار
ما يلحگ بعد ما بالعمر تالي
وتساوت ما بعد بالروح مچمل للحزن خالي
ولو شح الرفيج وطول المطراش
چا ياهو اليوصل ليك مرسالي
آنا بعازة فزعتك يالفزعتك غيف
وذراع الگصير بعازة الوالي
عفاني وكاددت والعاتيات اثگال
ما خففن وزني وخفن اثگالي
بعمري ولا شكيت لغير شخصك حال
ولا انت بچلمة المنگود ترضالي
إذا نوبات غيضي يجاوز المعقول
وأثگب وأشتعل لا تنكد أفعالي
اشو مثل الرطينة وعندي مدري شلون
شيغلي الرخيص ويرخص الغالي
وتگلي أسكت وشوف المالهم بالضول
صارلهم مكان وگدر من تالي
عاد أزهگ وكت البالخرچ مضموم
وألحَج بالگباحة الراح والحالي
مهي ساعة وزة مطلوب بيها الغيظ
دخن والعتب خلي العتب تالي
مدام اتوازنت والغي طفح ليفوگ
جاشلك بحيلك والنشط والي
تبي تجرب گدرتي اعلى الصبر يعگاب
لا يخفاك صبري ولا وسع بالي
آنا أبن الكل دهرهم مآتم وعاشور
الفرح طيف ونسيته وراح من بالي
هلي ادور السنين وعيدهم تابوت
من هور الصحين الحزن يبرالي
ولو نوبات أغني بطور آنا الياويل
واليسمع أغناي يگول هنيالي
مو بطران أكابر على اعناد الضيم
ما ودي التورج عليّ عذالي
صلافة عين مني شما يلچني الضيم
وآنا وداعتك لا بطر لا سالي
آنا معاشر الضيم من الصغر لليوم
صار الضيم وصمة بگصتي يلالي
يطويني الحزن طوي الغزل للصوف
وأبعد عن طريچه ويضل بذيالي
آنا بياهي التهي وسنيني كلهن سود
بأولهن بديت ومالهن تالي
ياصبر الصبرته ولا صبر أيوب
وياحزن اللبسته أگدار يحلالي
اورجك خاف أگدار خاطرك يعگاب
وخاف يهز كيانك ثگل حَمالي
فصمت أعنان صبري بدعوة اكعن بيه
وتگنطر عن ضهرها وطاح خيالي
آنا يعگاب مدنف مايگصني السيف
مغتاض اعلى غيضك كل گصد مالي
رد مع اقتباس
