مثل صورة شهيد بحرب ال ٨٠
ملامح مابقت بينه

لا عشنه الفرح لا شفنه راحة بال
عكس الوادم تمنينه ماضينه

فطّنه اعلئ الحزن والموت والتابوت
وترسناها المگابر من اهالينه

من گدما نودع كل وكت شبان
كل دفان لازم بالسره اعلينه

ماميتين بس دور المگابر زين
اوعدك تلگه ويه الموته اسامينه

عَشنه اسنينه نفكر نعيش شلون
تهنه وطحنه بيد الما يدلينه

جعنه وماكو حيدر والعمايم جيش
مانعرف الخبزة منين تلفينه

بلد خيرك وگع بيد اليَعّرف يبوگ
بيد الما تغزر دمعته بعينه

بلد مابيك بس زيارة اهل البيت
ولو ما همه محد يعترف بينه

شوف صيار امس صعدوا على المريخ
واحنه الموت يعصرنه ويبدينه

الماعدهم حضارة تسيدوا ع الناس
واحنه اهل الحضارة شمالنه ؟ شبينه ؟!

دول ماعدها بس شچم نهر وبعير
وعبرتنه وبدت تاخذ محاچينه

واحنه الجيش يكتل بالشعب لو ضاج
الله اليدري باچر ياهو يحمينه









كريم البغدادي