من لگيتـــك.. سـاد إيــدك.. عالتــراب
مـن حرگتــك.. علـي لومـن.. الصــواب
ومحبسـك ماهـو.. المـاخـذه ياهـو
خويـه .. خويـه
______________________________
أرد أسألك عن چم جرح ماشفته بس حسيته
وجهك ترف شنهي السبب فوگ الرمل حطيته
من الخجل لوبيك أثـر وجهك علي ضميته
وچفك الـ ينطي ويندعي شـنهي السبب سديته
إحچي يالما عودتني إعله السكوت .. چان چفك لليتامه وللقنـوت
الوجع سد چفك . لوقصد عندك !
خويـه .. خويـه
______________________________
ظلمه الدرب يابـوعلي وبلا ضوه اندليتك
عطر اللبن مال ام حسن دلاني بيـك اوجيتك
بين الجثث مادورت ضاگ الهوه وشميتك
اليتدور الماهو عرف ابريتي انته وانه ابريتك
ساد اعيونك شني معقـوله ميت .. انته ميـت خويه لومنـي استحيت
إحچي يبن أمي . ظل يصل عضمي
خويـه .. خويـه
______________________________
جيتك مثل أم الولد بكل خطوه يعثر جدمي
أختك لچن لمن طحت جيتك ابشوغة أمي
اتدنيت الك واشتم گمت دم بـي عطر من دمي
بس گلي بسمي امروتك مشتاگه تلفض أسمي
گلي زينب گلي خويه أي كلام .. حته أكدر امشي وأرجـع للخيام
والمدللهن . شراح أگللهن
خويـه .. خويـه
______________________________
گوه اوصلت ونوب أرد بس وحدي چا شيردني
آنه احسبت نرجع سوه ومن ايدي خويه اتكضني
بس من بچيت وماگمت حسيتك امفارگني
اوگتلك بعد يابوعلي للخيمه شيوصلني
حيلي ظل يمك رجعت ابلايه حيل .. وبعدت الخيمه علي والدنيـه ليل
امشي وعيوني . على الجابوني
خويـه .. خويـه
______________________________
هيية الأخو ايخلي الأخت طول العمر مهيبوبه
چا شـو رحت روحة نظر يالوگفتك مطلوبه
كعبة انته والعده ذنب يمك اتطيح اذنـوبه
المثلك اشلون اتجـرأو باگـو محبسه اوثوبه
ياعزيز أمي الزلم شمسويه بيك .. مثل دورة معصبي دارو عليك
ترفه وجنـاتك . مثل چلمـاتك
خويـه .. خويـه
______________________________
من ارجعت جنـي ركض گالن شني چا وينه
وانه طحت ماسيطرت من عاينت لسكينه
وگلت الهن وگوه گلت الكاشخ أجه امسلبينه
وگللي سد عينه الولي وگلت الهن إي سد عينه
التفرش امصلايتك گـلتلي وين .. للصـلاة اليـوم مافز الحنيـن
دنگت راسي . اوجاوب إحساسي
خويـه .. خويـه
______________________________
كلمات واداء : مرتضـى حـرب
1441 هـ
______________________________
تحميل mp3
رد مع اقتباس
المشاركة الأصلية كتبت بواسطة sawsanmahmoud
