مو وكته الوطن ينباگ ، مو وكته
بچه گلبي اعله سالفته
مو وكته الوطن ينباگ ، مو وكته
الوطن: منّ التفت والگاك بس انته
وآنه وضحكي من تروح
نتشيّع شمس سكته
وليش اتلاگه صدفه اوياك مثل الطيف ؟
بس افراگك بوكته
الضوه بالظلمه ما ينباگ
يگلبي اشمالك اتهدّه
خيالي وحزني بس اوياي
الضحك وَيْ ظهرك اتعدّه
لَچَن هم عايش ابلياك
الطلق كتّال لمّن يرگض لوحده
واشوفك بالحلم عـ الباب
وافز والگه الدمع مو ماي
الحلم ينجاس بالظلمه .. صدگ چذاب
رحت منّي رمل بتراب
ارَجعك بيش ؟
ملامح بيّه ما تعكسها المرايات
اريد اعرف جواب الليش
عندي اهواي
خطف عمري ورق عـ الماي
وحزنك شوّف شبيه
الهوه ايطلّع شكو امن الناي
قطار انته ايتشابه وجهك ومگفاك
تروحلهم واشوفك جاي
وعلى عيونك وشل ملگاي
دخذني لديرة اسنينك
شكبر شوگك گبل لا جيك
لاچن يختفي بملگاك
زينك ضايع بشينك
اجيك مغلّف بضحكي
وتشگّه بكل حزن عينك
تره الناعور اذا ما ينجرح ميعيش
اريد اندل شكو بوينك
ويهنيالي شكثر محظوظ
أمد روحي لسچاچينك
وشيخَسرَك لو ذكرت إسمي عله لسانك ؟
واْنه اتمنيت ذرعانك
تمون اعله الغراض اوياي
وتحط عطري اعله قمصانك
بعدك والصور بدموعي تتنظّف
بحضني ايباتن وخلّيت
يتحسّر عليها الرف
لچن شيسد عطش ملگاك ؟
وثلثين العطش عـ الطف
وانه امن اشتاگلك أنهاب
الشمع بس يستريح يموت
أعجبك عـ الشماته أصلف
وقفلت اعله الضحك بابه
من گلبك لگلبك
عشت مثل السيف
من اگرابه لگرابه
مدفون ، السبب مو لأن فوگ الگاع
البير الناس گامت كلش اتهابه
وچي أبيض گلب منوخِذ مثل الجام
الضوه يعبُُر گُبَل ما يحترم بابه
وعليش اتروح للبطران
وآنه وضحكي ردنه وياك
الراسه وجدمه واحد شمع موش انسان
أجيك مغمّس بشوگي ، وأرد فشلان
الدمعه اتمدّد بكل عين ، بيها هموم
الدمعه : طفل نعسان
واطيح اعله الحزن چم أوف
حزن يندل وره الشبّاچ
يشب بيّه اعله كلّ امچان
حزن يندل الما أندلهن بروحي
بشع ما يشْهَگه الدخّان
وانته ولا دست دربي
النهر يعكس شنو الفوگا
وأنه عيوني مري لگلبي
وعلى درب الفرح شبدي ؟
الضحك يتوچّه عـ النسيان حتّى ايگوم
وأنه نسياني مو عندي
واْشبّن من تحطني ابعيد يم جيدك
وبعد گلبي من أهد فرگاك
يندس صفْحِتي ايريدك
بعد وهلالي يم الناس
يفگد كل شهر عيدك
واْنه أكبر أمنياتي اوياك
أتلمّس بديّه أيدك
ولو كلهن مشن ويّاك
ضوه طب بنهر بي ماي
بعد شيرِد مواعيدك ؟
علي قاسم
رد مع اقتباس
