هنا

[*RÂყÂм*]

قصيدة : حل فرضك
للشاعر : وسام الشويلي
المناسبة : ليلة 1 صفر 1441 هـ
العزاء المركزي للشيعة التركمان/كركوك
طور : #انه اول من عاشت


حل فرضك ياعاشگ للمشّايه
واتوجه لحسينك واقره الآيه
أويه الوفّايه .. شيل الرايه
-------------------------------------------
ياحُسيني الهوى .. وكربلائي العشگ
هالمسيره ابتدت .. والمواكب تدگ
تحَضّرَت رايتك .. وينه چف الصدگ
وادري عندك گلب .. عالمشي محترگ
گلبك بين ضلوعك يصرخ امشي
لأرض الطف ودّيني واترك كلشي
حسين الغايه.. شيل الرايه
---------------------------------------
زيارتك واجبه .. والله مو مستحب
وياغبار المشي .. اغله من الذهب
عاين الخطوتك .. تلگه بيها انكتب
حجّتك عمرتك .. تمّت ولا عَجَب
خطواتك كثّرهن يكثر أجرك
الأيّام التمشيها تطوّل عمرك
سنين هوايه .. شيل الرايه
---------------------------------------
من تِضَيع الدرب .. گلبك البوصله
يأشر بدگّته .. ناحية كربله
بالدرب تستمع .. كلمة الياهله
تفضل بخدمتك .. الزاير اندلّلـه
راحه الما شايفها حتى ابيتك
بس انزل شرّفنه وتقبل ريتك
دارك هايه .. شيل الرايه
-----------------------------------------
گاصده الكربله .. تمشي جن وإنس
والگمر يلتقي .. بكربله وي الشمس
هالشعور اختلط .. داير بكل نفس
مدري موكب عزه .. مدري زفّة عرس
زوّار وحزنانه وظلّت تبچي
وفرحانه چي زارت بالحب تحچي
حُب وقرايه .. شيل الرايه
---------------------------------------
چم مسيحي الطلع .. للحسين اعتنه
بگلبه غيرة وهب .. والعشگ أعلنه
هذا چم (حُر) اجه .. اينادي تايب أنه
بالذنب معترف .. للحُسين انحنه
درب حسين المَنجه وباب الرحمه
ما يفهم كل دينه الما يفتهمه
الكوثر مايه .. شيل الرايه
--------------------------------------
هذا فطرس اجه .. ومد عليك الجنح
موكبه بالسمه .. والدرب منفتح
الحضرتك خدمته .. من الصبح للصبح
ايدوّر الغانمه .. بهالدرب والربح
مايغفه ولا لحظه لأجلك صاحي
ويگلّك بحسينك طاب جناحي
هوّه دوايه .. شيل الرايه
--------------------------------------
چم رسول ونبي .. وياك إجه وچم مَلَك
مشيتك عالأرض .. لو نَجم شايلك
المصطفى وعترته .. كلها تستقبلك
والبُشاره تجي .. الجنّه صارت إلك
حسين الجنّه الكُبرى ويشع نوره
تزور الباري بعرشه من تزوره
اخذ حچايه .. شيل الرايه
---------------------------------------
هذا رب الوفه .. واگف برايته
بچف گطيعه يصب .. لليجي بجرته
مايَزل للحرب .. جاهز بلامته
القائم المُنتظر .. مِنتظر طلعته
ثارات ابن الزهره لازم تبدي
والرايه ايسلّمها بيد المهدي
بأمره ورايه .. شيل الرايه



____________________

[الملاذ الاخير]

يسلموا للمجهود والنقل ريام

[*RÂყÂм*]

يسلموا للمجهود والنقل ريام

شكراا جزيلا لحضورك