قصيدة : ماخذ لوني من لونك
للشاعر : علي الخفاجي
المناسبة : ليلة 29 محرم 1441 هـ
العزاء المركزي للشيعة التركمان/كركوك
ماخذ لوني من لونك
فدوه أعيوني لعيونك
******************
مجنونك وأعرفك زين
ساعة موتي تحييني
هذا أنه وهذاك أنت
دم تسري بشرايني
ضمني بخيمتك يحسين
ضمني ولا تخليني
عمري يروح ألك فدوه
وفدوه تروح ألك عيني
ماعوفك يمحبوبي
شمعه وتضوي بدروبي
وي جمع اليحبونك
فدوه أعيوني لعيونك
******************
روحي بحضرة الضامي
طير وعالضريح تحوم
حبي وياك شجره وماي
قصة خادم ومخدوم
عبدك وأنت مالكني
معصوم بظهر معصوم
يمروي عطش هاجر
ليش من العذب محروم
يا آيه وأبن آيه
تخفگ بأيدك الرايه
خليهم يشوفونك
فدوه أعيوني لعيونك
*****************
كل دگه بنبض گلبي
تسبح بأسمك وتقره
ياهو المثلك وأنت
أمك فاطمه الزهره
واليمشي بخطه دروبك
ينطي بلا ثمن عمره
كل طلعت فجر گبرك
يفتح للزمن ثغره
حبك بلسم أجروحي
غالي وأغله من روحي
شلي بعمري من دونك
فدوه أعيوني لعيونك
*****************
محبوبي وأجي الگبرك
وأركظلك ركظ حافي
لو هذا العشگ لو لا
يا نبع الوفه الصافي
مجنون بغرام حسين
كلمه تظل على أشفافي
ولمن أوصل البابك
تضمني بحضنك الدافي
حبك بالنبض يسري
غالي وأغلا من عمري
ماهمني اليعادونك
فدوه أعيوني لعيونك
******************
مسموح العتب وياك
يمسير سفينة نوح
أسمك عالحجر أسمك
خطيته بنحر مذبوح
وأبداً مو عجيب عليك
لمن ينكتب عاللوح
وي دمك يبوالأكبر
روح تشاركينه بروح
أنه العمري ماعفتك
بعيون الگلب شفتك
أسأل عنك أشلونك
فدوه أعيوني لعيونك
******************
تضوي أنجومك بليلي
ومن دونك فلا أگدر
ما أوفي عشر فضلك
لو أرخص ألف منحر
جمره من العطش گلبك
وأنت بأيدك الكوثر
شلون العاشگ الملهم
عن محبوبه يتغير
گلبي بأيدي خليته
وبيك الليله وصيته
وغصبن عاليعادونك
فدوه أعيوني لعيونك
*****************
تمطر غيمة أحزاني
لو بين شهر عاشور
وحسين بعطف گلبه
يجبر خاطر المكسور
ليل البدد أحلامي
هم يفضح ظلامه النور
عاهدتك وأظل وياك
شما راد الزمان يدور
مايمحي الدهر ذكرك
ومايمنعني عن گبرك
وأنه من اليوافونك
فدوه أعيوني لعيونك
___________________
رد مع اقتباس