قصيدة: يا مشاي عابس نده وينك
للشاعر: سيد عبد الخالق المحنه
المناسبة: ليلة 1 صفر 1441 هـ
المكان: العزاء المركزي للشيعة التركمان/كركوك
طور : #يا ستار #يا مشاي #مذهولين


يا مشاي .. عابس نده وينك
يا مشاي .. ينتظرك حسينك
»»»»»»»»»»»»»»»»»»»»»»
خلي جدمك عالدرب يترك أثر
شجع اليتعب واخذ بيد العثر
خلي بيمينك ترف راية گمر
ها يبو الغيرة اجت ثورة صفر
رفعة راس .. والراية بيمينك
يا مشاي .. ينتظرك حسينك
»»»»»»»»»»»»»»»»»»»»»
يله شد حزامك وجيد الهمم
امشي مشية قائد وشايل علم
سلم اعله أهل المواكب والخدم
والاجر باچر على گد الالم
أي مأجور .. يالسددت دينك
يا مشاي .. ينتظرك حسينك
»»»»»»»»»»»»»»»»»»»»»»
امشي وبطول الدرب بالك تمِل
يا غيور وكل صعب عندك سهل
ويَ كل خطوة علي يا أبا الفضل
امشي وأسرع سجل إسمك بالسجل
للعباس .. قدمله جفينك
يا مشاي .. ينتظرك حسينك
»»»»»»»»»»»»»»»»»»»»»»
لو شفت واحد وگف ارجع إله
گله خطوات ونطب لكربله
گله من توگف تفرّح حرمله
ذاك ابو الأكبر ينادي يا هله
بس خطوات .. ما بينه وبينك
يا مشاي .. ينتظرك حسينك
»»»»»»»»»»»»»»»»»»»»»
گالوا بحر الشمس تمشي صعب
گلهمْ شما انچوي يحن القلب
انه ما ناوي سلم ناوي حرب
لا أخاف ولا أفكر بالدرب
لا ما اخاف .. وتشاهد بعينك
يا مشاي .. ينتظرك حسينك
»»»»»»»»»»»»»»»»»»»»»»
هوس وخلي الگعد يركض ركض
هوس ومن هوستك هز الارض
توضه واعقد نيتك سادس فرض
خلي خصمك من وفائك يتعض
خلي الشين ... يتحدث بزينك
يا مشاي .. ينتظرك حسينك
»»»»»»»»»»»»»»»»»»»»»»
امشي شجع غيرك وشد العزم
والنساء الذمة برگاب الزلم
سد الحلوگ الحجت هذا المهم
خلي ابو فاضل يگلك والنعم
والتاريخ .. سجله بدمع عينك
يا مشاي .. ينتظرك حسينك
»»»»»»»»»»»»»»»»»»»»»
امشي واهتف يحيى يحيى مذهبي
وامشي استقبل ضعن آل النبي
واسي زينب من سايط الناصبي
امشي دمعك يغسل تراب السبي
صير دموع ... تجري على خدينك
يا مشاي ... ينتظرك حسينك



«««««««««««««««««««««