قصة حقيقة لدكتورة ...يبقى الطبيب اكبر مقاتل
اليوم راح احجيلكم عن الدكتورة شهباء مسلم اسماعيل الخزرجي
وراح اخليها هي تحجي عن حياتها وشلون حصلت على الشهادة العالية وحققت حلمها رغم صعوبات الحياة وقساوتها
السلام عليكم اني الدكتورة شهباء تحصيلي الدراسي دكتوراه بالصيدلة وراح احجيلكم شلون وصلت لهاي المرحلة العلمية
من جنت عمري سنتين اتمرضت بمرض شلل الاطفال لان ماما تأخرت يالة ودتني للتلقيح لذلك ضليت لا مشي ولا حركة ومن صار عمري اربع سنوات بابا اشترالي مساند وكمت امشي عليهن شوية شوية...
بس رغم هذا كلة اهلي ابد ما حسسوني بانه مريضة او اي شي مع العلم اني اصغر فرد بالعائلة وحتى اخوية الجبير جان دائما ياخذني وياه بالدراجة مالتة ويغيرلي جو لو نروح للسينما يعني ابد ما تركوني وظلوا وياي...
ومن صرت بالاول ابتدائي بابا اتقاعد من شغلة وظل وياي يوديني الصبح للمدرسة ويرجعني الظهر ومن ارجع للبيت يكعد وياي يدرسني لان بابا جان عنده حلم وراد يخلق من عندي انسانة راقية واحصل شهادة عالية تعويضا عن المرض الي اني بي...
ومن وصلت للثالث متوسط شفت روحي متفوقة واكدر احقق الطب الي هو حلمي وحلم بابا وحلم اهلي كلهم لذلك شديت حيلي وكملت ادراستي وحصلت معدل عالي بالسادس اهلني لكلية الطب بس من صار تقديم الكليات دخلوني فحص لياقة بدنية وشافوا عندي شلل لذلك ما قبلوني بكلية الطب وجانت صدمة جبيرة الية ولاهلي...
بابا اخذني وسافرنة لبريطانيا وهناك دخلني صيدلة وجنت متفوقة بالجامعة بس من كملت سنة اولى كلية رجعنا للعراق لان صارت عدنة مادة قليلة بابا ميكدر يكمل باقي السنوات لذلك دخلت بجامعة بغداد وكملت الكلية وطلعت الثالثة على دفعتي مال الصيادلة...
وتخرجت واشتغلت تقريبا ستة اشهر بالصيدلية بس اني جان حلمي تدريس مو افتح صيدلية واكعد بيها لذلك قدمت على التدريس لان ردت اصير استاذة جامعية بس ما قبلوني علمود الاعاقة مالتي لذلك طكيت صور لروحي واني كاعدة بالمساند ونشرته بالجريدة علمود توصل لاعضاء الدولة الجبيرة...
ورة فترة طويلة اجتني رسالة للبيت كاتبيلي بيها راجعينا فكمت اراجع اني وبابا على الشغل ورة فترة اتعينت عدهم بصناعة الاعشاب لان اني جان اختصاصي الاعشاب الي الها علاقة بداء السكري لذلك اشتغلت باختصاصي لمدة سنتين تقريبا واخذت الماجستير وبعدين انقلت على الجامعة وكمت ادرس بجامعة بغداد استاذة جامعية...
بس الحياة جانت صعبة وياي وبهاي الفترة اتمرضت بمرض مناعي بعد ما كدرت اشتغل لذلك قدمت اسباب صحية وطلعت وفتحتلي صيدلية وكعدت بيها بس ابيع دوة ورة فترة طويلة الحمد لله طبت من المرض المناعي ورجعت لدوامي ولشغلي...
بابا اتوفة بال2004 وجانت عندي صدمة جبيرة لان بابا جان كل حياتي وهو الي عاف شغلة وكعد وياي حتى اعيش رغم الاعاقة واكمل ادراستي بس رغم هذا كلة ما انكسرت وظليت متمسكة بحلمي وردت احقق حلم بابا لذلك سافرت اني واستاذ وياي بالجامعة لبريطانيا وهناك حصلت الدكتوراه وجان مفتوح كدامي الدكتوراه بالطب وبالصيدلة بس اختاريت الدكتوراه بالصيدلة لان شفت الطب بي جراحة وعمليات واني الاعاقة ما تخليني اجري عمليات او اشتغل بالجراحة وبعدين رجعت للعراق وصرت استاذة جامعية ودكتوراه بالصيدلة....
وحققت حلمي رغم الاعاقة وصعوبة الحياة وياي واهم شي بالحياة واحد يصير عندة مثل الدافع داخلة ويخلي حلم كدامة وان شاء الله يوصل الة وكون ما نخضع لاي حاجز بالحياة يمنعنة عن تحقيق حلمنة والارتقاء باعلى الشهادات والاختصاصات....
وشكرا الكم لان استمعتوا لقصتي واتمنى استفاديتوا منها....
والسلام عليكم ورحمة الله وبركاته...
تحياتي
زنبقة الغرام
رد مع اقتباس
المشاركة الأصلية كتبت بواسطة انثى مخمليةة
