يالبعدك طفل
يالبعدك طفلوك .. نقمه العشـكَ مــن كَالك نعمه
يالبعدك طفل .. وشجـابك اعله الضيم
جايب شفـتك .. ودوّر اعـله اشفـاي
وشفافـــك خطـــّيه .. ادوّر الممه
تكَلي انطيني كلمه .. انطيـك كلشي تريد
وعلى الاحوط وجوباً تــــرك هالكلمه
احبـــك ما اكَلك .. بس اكَلك ليش
لان حب الورد معنــــــاها نشتمه
وياممنوع لمســــك انت بس للشوف
طبع .. جنح الفراشه اتفـــرهده اللزمه
وايدك من ثلج .. وجفـوفي حـــر تموز
تبدّي الماي ليــش ونعــــجز انلمه
ياشسمه .. لحلاتك قاصــــره الاسماء
وبدقة اوصـافك ســــودنت شسمه!
للقمه حلم توصــل محــــاسن ناس
بس انت الوحــــــيد انولد عالقمه
امس بلبل خبصنه .. ومـن سمعلك صوت
صاح اهووووو مــــداني وكتلته الغمه
ويالمرهدن ترافه وكـــلشي يلمـع بيك
يعني امك شمس .. لــــو خالتك نجمه!
احط الحور يمك مـا اعـــــاين حور
قياساً بيك .. عمــــي .. وداعتك زلمه
يتنافض غواك مــــــن الجدم للراس
وعطر سنبل دلالك ســـــكـّر النسمه
مناجل عين ناســــك .. والخلكَ فلاح
وجم تشرين اجــــــاك ومطرته بفمه
ظل مروتك لاتطـــــــلع من البيت
ماتدري البراءة اتعـــــــاني من ازمه
بس عندك حلكَ والعــــدنه موش حلوكَ
مجرد فتحه منهــــــــا انعبّر اللكَمه
رد مع اقتباس
