(بنات الدم)

بنات الدم
حزنهن ياخذ من الليل لونه ومستحاه
والخوف

كبرن والعيون إچفوف وتراب السنين
اهدوم
وي كل نسمة لو مرت
سمه توگع

بالمرايات ضاعت كل
ملامحهن الحلوه
وباتن بلا جيب يسترهن

ما يندلن بيا گاع وجه
الله..؟!

يلگن خوفهن سكته ويطشن فوگ
كل غيمه حزنهن
دم..!

يرحن وين..؟

وناگوط العمر سجين…

اشتهن يلگن وجه من لونهن يضحك
اشتهن دمعة اخو بعيونهن تشهك
اشتهن ينسن وما ينسن

نهر سكران فرحتهن
چم شيطان بيهن يغسل
ذنوبه

يلبسن مستحاهن والچذب
قبله
يبچن والعرب
خنجر

يردن طين
وتاخذهن الريح وينسن والكاس ما وشل
وبعده الليل يشربهن

بگلب كل نجمه چم ليله
استحت من روحها
ودمها

يامحراب بيه من خوفهن سجده

دمع يوگع إبچف الله
أگبال الله
بنات الله التريد اتموت من
عدهن يردن من جديد
يخضرن بلا ماي

طفل يذبل شرفهن والدروب اتبوگهن
والناس ما ترحم

على المامش گضن والروح نزوتها
سهر چذاب

يلبسن كل حزنهن
والدرب عريس
يموتن ويه كل نشوه
ويردن والفشل
دينار..!

التريد اتعيش ما تنلام

ويعيشن ليلهن والفجر ما يعذر
حلم بارد وماي اسود..!!

ضلع مكسور وحچاية ضمير
وگاع

گبال اعيون بيت الله اشكثر تنباع..

صلاة ابليس تشربهن

بنات الدم
حلمهن ضاع..!








لـ احمد فشلان الوائلي