قصيدة : شفتك إبلا علم
للشاعر : السيد عبد الخالق المحنه
ليلة 23 محرم 1441 هـ
حسينية إم الحسن / الفاو
طور : #يا_ظلام
يا حسين .. شفتك إبلا علم
يا حسين .. طالع من الخيم
يا حسين .. أسرع من السهم .. يا حسين
***********************
يا حسين وأسمك أكبر من طفوف
أنته واحد لكن نشوفك إلووف
سيدي الشافك طحت لا ما يشوف
احنه ما شفنه ضوه تذبحه السيوف
يا ذبيح .. حارس على الضعن
يا ذبيح .. تحكم بكل زمن
يا ذبيح .. كلها عندك خدم .. يا حسين
**********************
طاحوا الگالوا طحت يالما تطيح
وانته كلما تتعب أكثر تستريح
من شفت دمك على وجهك يسيح
شفتك الأجمل نعم أجمل جريح
بالجمال .. ما يشبهك أحد
بالجمال .. معجزة من الأحد
بالجمال .. ما يوصفك قلم .. يا حسين
***********************
إستغربت گالوا متت وإنته بضماك
وأنه أدري بالنهر يُطلب رضاك
بس تأشرله يجي يزحف وراك
تالي يا زمزم ضميت وما رواك
ما رواك .. وانته سيد النهر
ما رواك .. بس سهم بالنحر
ما رواك .. واعتذر للحرم .. يا حسين
***********************
گالوا بجسمك مخالبهم تلوح
حتى ما شافوا جسم شافوا جروح
وجهك بليل إهدعش شفته بوضوح
أنه شفتك جاي ما شفتك تروح
والعجيب .. جرحك البي دمه
والعجيب .. ينزف من السمه
والعجيب .. من تطيح القمم .. يا حسين
*************************
تعثرت بدموعي من شفتك بچيت
وبوكتها كلشي رايح إنته جيت
عالنهر مات الحچي وإنته الحجچت
أستقام الدين من إنته نحيت
عالكفيل .. چنها طيحة دمع
عالكفيل .. طايح و مرتفع
عالكفيل .. والدليل انجسم .. يا حسين
**************************
شفتك بدرب السبي برمح الطويل
حيّ أشوفك والرفع راسك قتيل
عالقلم وصفك يبو الأكبر ثگيل
هوايه انته وكلشي عد الله قليل
ما تموت .. ماتوا وما متت
ما تموت .. راحوا وما رحت
ما تموت .. والحقود انهزم .. يا حسين
***********************
انته صح راس برمح لكن أمير
انته نور وللأسف خصمك ضرير
وأنكسر ظهرك لجل تجبر كسير
كلشي ضحيت لأجل يبقى الضمير
يا ضمير .. يجبر بخاطرك
يا ضمير .. يستحق خنصرك
يا ضمير .. يستحق الالم .. يا حسين
««««««««««««««««««««
تحميل mp3
رد مع اقتباس
المشاركة الأصلية كتبت بواسطة هيڤين
