شمالك زاعلت فييّ
انّشدني ولو چلمه
ارضه بـ وشلة شلونك
انّشدني
بعدها عيوني ترّوه بلمحه عيونك
بعدني مناطرك ياماي
نده گلبي العطش هلّ ولو دمعه بخدّ
هلّ خَل يندثر غيضي
كبل لا دمعتي تبرد
هلّ خَل افز گذله بوجه المرايه
هلبت
تنزع ثياب الزعل والگاك
من هوسة الثوره مفَرزن حچايه
مفَرزن روجه شهله شما نشف لوني
ولك يمبلل جفوني
شمالك زاعلت فييّ
وجزيت لشمس غيري ركاض
شماله الدفو البضلوعك موجّر
بزغ للغربه شبگه وفاض
اذكر چنت ما تغتاض
واذكر بالزعل تلّبد حدر چفي
عن لاتنده الچلّه دفو اعنانك
عن لا يزغر امچانك
يلي چنت انّسه اصابيعي عله شعرك
لحد ما هيّستهن طوگ
زغر گدرك وفض الشوگ
واتلاشت ملامحنه
وبچينه اعمارنه
كل دمعه حول اتطيح
وناوشنه الشمع للريح
وتبدينه نده عله الماي
ماندري عله ياروجه يودينه الوكت ونطيح
احمد الطفيلي
رد مع اقتباس
