راية العباس مو يم النهـر
ماهوت عالگاع صعدت للگمـر
بالسمه سووها حضره
بيها دم وبيها طبـره
وبيها شد حسين ظهـره
حيــو عبــاس
هالليـله هالليـله
حيــو عبــاس
_____________________________
رايه وتشدها العشاير للأخوه والصلح
والحلف بالرايه كاذب تعمه عينه وينفضح
رايه واليلزمها كون امنگعه اچفوفه ابملح
من تحطها اگبال ميت عينه رأسن تنفتح
اقماشها العباس بيده امفصله
كتب فـوگاهه مدد ياكربله
ازغيره چانت واشتراها . على اچفوفه علماها
لكربله ويـا خذاها
حيو عباس
_____________________________
انته تدري ابيا طريقه خيطتها أم البنين
خيط من احجاب زينب خيط من ثوب الحسين
زورتها اشگد مراقد شبعتها من الحنين
يوم كامل بيتتها ابصحن أمير المؤمنين
حته عباس من ايشيلها
ابكربله ايتعب زلمها وخيلها
بيها ريحة أبو طالب . تعلگت فوگ المواكب
بيها دمع المهدي كاتب
حيو عباس
_____________________________
راح اسولفلك عليها وانته افهم مطلبي
الرايه عند الله تعادل نص إمام ونص نبي
الرايه علويه وتشور چنها تل الزينبي
گوم ياعباس صاحت خذوا زينب للسبي
وابوفاضل گام يرعد صوته
اترخص من الله ورجع من موته
والانصار ايهوسوله . ياهله بهاي الرجوله
ميت وگام اعله طوله
حيو عباس
_____________________________
الرايه من هزاها بيده شخطت وجه السمه
الكسا هيه اليماني البي تغطت فاطمه
چنها بنتك يابوفاضـل بس عليك امعلمه
الرايه لويعگوب شمها ايروح من عينه العمه
من تطب ابيتنه ايطب الأمان
رايه بس تشبه مفاتيح الجنان
للمرض رأسن تعالج . تقضي انواع الحوائج
بالحرب ترسم مناهج
حيو عباس
_____________________________
راية العباس كشخه وتنطي للخايف مدد
بيـها من تمسح وجها العاجر اتخلف ولد
الله للقـرآن صدگ آيه لو نزل بعد
قُل هوَ الله ثم نقره قُل أبو فاضل أسد
قوة الله وعلـي بچفوفه
شلع شط العلگمي من اجروفه
للعطاشه سحل جابه . شـربوا الماي ابثوابه
گامـوا ايحنون بابه
حيو عباس
_____________________________
راية العباس هيه اتفرح اللطامه
اتصير للمهدي عبايه وهم تصير اعمامه
حسين شداها اعله ظهره يوم طاح احزامه
تكره العامود كلش لإن طر الهامه
راية تنطي الحيل للمشايه
ياحـلاة الشال هاي الرايه
بيها يتحزم الزاير . صارت ابعلو المناير
نصرت الفوگ السواتر
حيو عباس
_____________________________
كلمات الشاعر | محمد الجماسي
_____________________________
<< تحميـل mp3 >>
رد مع اقتباس
المشاركة الأصلية كتبت بواسطة تشيللو
