مساجله ابو ذيات بين شعراء سوق الشيوخ
دارت مساجله ابو ذيات بين شعراء سوق الشيوخ فبدأت المساجله
اهموم الوكت صف الجيش يصفين
ابراسي اوخابطات الدهر يصفين
من اصيحن اه اخلي الطير يصفن
اويصيدونه اويذب الصوج بيه
حبيب الاسدي
بده وكتي ابهجومه ايصول ويشين
اويحز علم الشماته ابهاي ويشين
قسم بس اخلص من الغين وشين
انتصر لو جان وي الوكت ميه
عدنان الغزي
حمولي اتجدسن منفوك منفوك
من وستاحشلهه المات منفوك
انخل جوفي اوكشر ضليت من فوك
اموصل من يطك الريح بيه
احمد المشرفاوي
وحك الي دعتله اورجع سالم
جفي لاتضن للغير سالم
لون طالب عليه راس سالم
اجيبه او لا كطاعك هاذ بيه
محمد صاحب الخفاجي
ابثلاث اكتار همك دار ونحاط
علينه او وين نطي الوجه ونحاط
امحدب من ثكل فركاك ونحط
ابعصا موسه انتجيت انحنت بيه
فيصل العويلي
افت بلصبر فت الحجر برحاي
لحد ما فركس الطكاك برحاي
جنت مدلي عليه اعثوك برحي
ابجفاك اتمكطع الطواك بيه
حبيب الاسدي
ابرحه فتيت صبري موش برحاي
كبلك وصبحت محتار برحاي
من الدنيه تريد اعثوك برحي
بنازل وشرت لهل الحميه
عدنان الغزي
نوايب علي لج الوكت مالاج
ولا كت للمعصيه اوياي مالاج
اوعلي تنور حاتم حطب مالاج
ابكثر مالاج فج الربع بيه
احمد المشرفاوي
تواعدنه عله اذانك شيب اليل
ودور ريجي يابس شيب اليل
اوعلي من درت وجهك شيب اليل
اوشمس طلعت هذاك اليوم بيه
محمد صاحب الخفاجي
اشد ابحبل ودي اوياه ويفال
تبين من كتلني طحت ويفال
حدر ليل النعش ينشال ويفال
الصبح واخر ثلث نكلات بيه
فيصل العويلي
جبل ماهزني عي وكتي ولنكال
عريد اولا ردل مسني ولنكال
عن درب الهوى امكاطف ولنكل
جدم وترك اثر ينشاف اليه
حبيب الاسدي
شربت الحار بارد كلت ماحار
اومثل حيرت دليلي بشر ماحار
ثكل ديني اوشبجتي اتصيد محار
شسد والعوز ناصب شبج بيه
عدنان الغزي
انه التطرد الحيه رحاته
وانه الماصفك خايف رحاته
الوكت ما كلت بضلوعي رحاته
اولكه ابطاك الرحي ثلمات اليه
احمد المشرفاوي
البدو من السوك ماتوصل لساكي
اومن عيني انكطع بيه لساكي
انزل كصتي من اتمر لساكي
احترامن خاف عينك تصد ليه
محمد صاحب الخفاجي
الى من لاتدركه العين وتراه
هذاك الكطع بيه لحن وتراه
عله هونك كوس هجرك حيل وتره
عدل وكطع نزاع القوم بيه
فيصل العويلي
رد مع اقتباس
