درر العراق

*RÂყÂм* · 20/September/2019

قصيدة : يا مشاي حج لحسينك
للشاعر : ناظم الحاشي
المناسبة : ليلة 20 محرم 1441 هـ
المكان : حسينية الحاج داوود العاشور البصرة ابو الخصيب
طور : #يا_ستار

يامَشّاي حَج لحسينك طالِع
حَج مَبرور غافِر ذَنبَك راجِع
-----------------------------------
يَلّي ماگادِر تِحِج كَعبَةْ نَجِدْ
لربعين إحسين قَرُّر وإعتِمِد
مِثِلْ يوم الجابِتَك أُمَّك تِرِد
إبلا ذنوب إتگول تَوَّك مِنوِلِد
سَعيَك فاز للرَب ساجِد راكِع
حَج مبرور غافِر ذَنبَك راجِع
------------------------------------
الزار گَبْر إحسين قَدْ حَج وإعتُمَر
وطاف بالكعبه مَعَ الأثنى عَشَر
للعرِش مو عالأرُض هذا السَفَر
والدليل إتروح زاير للگُمَر
للزوّار هذا الأمر الواقِع
حَج مبرور غافر ذنبك راجِع
--------------------------------------
هاي كِل خطوَه على الحاقِد سَهَم
ضِد عَدوّ إحسين طِلقوهه الخَدَم
تدري فوگ الگاع كِل رَفعَة جِدَم
بيها رايح تطفي نيران الخِيَم
عَن إحسين چَنَك جاي إدّافِع
حَج مبرور غافِر ذَنبَك راجِع
--------------------------------------
بيها كِل خطوه إبمناسِك تِنحِسِب
مو إبحجّه إبالف حجّه تنكِتِب
كون مَكَه بيها زمزم ينشِرِب
حسين عنده الكوثر إومايه العَذِب
باب إحسين باب الله الواسِع
حَج مبرور غافر ذنبك راجع
-----------------------------
لوصِحِت لَبَيّك ماتدري إشْيحِل
مِثِل حَج البيت حَجَك يكتمِل
صَرخه بيها العاده دينك ينكِتِل
ونار بگلوب النواصب تشتِعِل
صَرخَه إتگول حَيدَر لا مو رابع
حج مبرور غافر ذنبك راجع
-------------------------------------
لومشيت الكربله إورجلَك خُطَت
يعني وَيّه أم الحَسَن رِجلَك مِشَت
والذنوب إطّيح من عندك بِدَت
وبيك زينب بالقيامه إتكفِّلَت
والعبّاس يصبَح لَجلك شافِع
حج مبرور غافر ذنبك راجع
--------------------------------------
ياحُسين إتزيل عن زينَب هَظُم
هاي صَرخَه تِشلَع إعيون الخَصُم
ياحُسين إوكًون وَيّاهه لَطُم
وَي عَدوّك توصل الكَسْر العَظُم
للعاداك هذا الموقِف رادِع
حج مبرور غافر ذنبَك راجِع

++++++++++++++++