مساجلة شعرية رائعة
موعودالرشيدي :
هسه انا ويني وين الوداع
وشلي بطلاع الروح كلساع
ماضنه گلبي بسوگ ينباع
متلف حزن و متلف اوجاع
*
عامرعاصي :
هسه انه ويني او وين الفراگ؟
مر الفراگ شلون ينضاگ
شلون العطش لو فاضت اشواگ
وظل الملح يتوسّد الراگ
*
موعودالرشيدي :
يتلاگن ابگلبي التوابيت
وادم نستني والها حنيت
آيا غربتي التارسه البيت
ريحة دمع بهدومي شميت
*
عامرعاصي :
كل خطوة بيه تخلّف دروب
كل شوگ خَلّف طيف محبوب
وبكل ثلج حسراتنه تذوب
نخلّف ذنوب و نغفر ذنوب
*
موعودالرشيدي :
يلفارگتني شلون تنجاب
گالولي جيت و شطت للباب
اركض ثجيل محمل عتاب
وعيوني كتن ماي و تراب
*
عامرعاصي :
بس يا كرستال السوالف
يا شمعة بكتار الصرايف
أعمى الحزن و الفرح شايف
جاهل يخاف وموش خايف
موعودالرشيدي:
آيا الفراگ الحنه ضلعي
وهل ماخذ الريجان دمعي
مدري عليمن اگعد انعي
بغربة وهجر ضيعت ربعي
*
عامرعاصي:
آ يا سوالفنه العتيجه
يا عطش محد فاك ريجه
يا هو الفرش خدّه لصديجه؟
وتصير دمعاته طريجه؟
موعودالرشيدي :
من انچفت بيه المشاحيف
شالتني اطروگ النفانيف
ارد اشبگ العافوني ابطيف
مابيه اونن گلبي انحيف
*
عامرعاصي:
موعود اظنن بيك موعود
حد ما يخضّر بالرمل عود
هذا الفرات شما عطش جود،
مگرود يحضن جرح مگرود
عامر عاصي
موعود الرشيدي
رد مع اقتباس
