وشم المدينه
وشم المدينه
ألى مظفر النواب حيا وحيا
التايهين المالهم بالصحره سجه
اجدامنا تزرع طوابير المسافه
والرمل والمنحدر والوادي ما معروفه نيته
والشرف سفرة ضباب
يخاف من عين الشمس تصلب وصيته
والكهوف الحبلى فطنه تخاف من وشم المدينه
من ليالي الحاكم الماشركت شمس بضميره
التايهين
بروسنا تصدع شمس تموز حريه
وفياي السلطه مبيوك برضاته
التايهين
العابرين الاخ غركانين بالظل
قزح ويطيرون بالهامش حقيقه
عاصفه وزفة زنابق زافاته
وغربونا وبالجيوب هواي شلنه الناس مزنه
هواي شلنه الوانهم حركة كلب من جملانه الوطن حزنه
وفوك كل اجتاف وادي احلام نوكف
والعيون تساوم الضفتين والمجذاف محذوف وقرابين انقرينه
وسفر توبه يكلف أقواس القزح روجة وسن
وبساط ريح
وخارطة ومرسى وهلاهل
وعتبة الوادي شبج للما قراها وما شطبها
عتبه ماتعرف تتاني تبوكك وتمسح سجلها
تبوك صوتك
لافتاتك
حيرتك
دفتر وفاتك
والوقت من يحترك مايبري ذمته
كون وجه اللافتات يقاوم المكتوب بيهه
كون تتطشر حمام احمر
اذا سير حزن آدم عليها
والطوابير التغازلنه بهمسها
وحنة خيوط الشمس بأعلان اخر كاع ترتاح بلجمها
جم خصر لازم نعاشر
اجم دعاء اجم سؤال يموت لو ما جان باجر
وظل مدينتنه يضيع بعينه ونشرب صورها
نلهث وصوت التعب يندل عمرنه
والزمن واجسادنا والكاع اهلنا
نقرا مرثية حلمنا المايموت المانهده وما يهدنا
وفوك من قوس القزح جانت مدينة
تشوفنه وماتحترك شامة بعرسها
تشوفنه وتنلام اذا طلعت شمسها
وبينه ظل يدبي العمر نكبر ويكبر صوت بينه
احنه من ظل يا مدينه
احنه من يا كنطرة يعبر حجينه
احنه من يا عين مهضومه انبجينه
احنه من ياباب دخلنه عمرنه وطيفنه وانسد علينه
وجان ليل وكل شي بالضلمه يتشابه
الا حرين الضماير
الا خطوات البيادر
الا لون التايهين
اللون الاصفر بالوجه نيشان غربه
نركص وجرح الشجر يعبر خريف الخوف صبحه
نشكه والخوف اشتعل ورمادنه يرفرف بجنحه
نسبح ويه الريح فينيق وتعسر واشتعل ذمه
ونطق بالروح رمحه
راجعين من القيامه
راجعين وشمس ديرتنه شمس حره وغريبه
يا شمس فانوسه يافي عطشنه
ماتعودنه نرد وخيوطج تزاعل زلفنه
احنه من تهنه رفعناج وحلفنه
نرجع ونلتم مثل حنة المغرب
خيط يفكد خيط مشراكج يزفنه
يا شمسنا وهل رجعنه
غسان عادل
رد مع اقتباس