هنا

[فقار الكرخي]

زفه تمشي
وليل گمرة
وناس فرحانه وتشوف

وجيس حنه
ومشط
ومرايه
وهلاهل
وبدله بيضه
وبرگع يناغي ال زلوف

وذهب ابو لعيبي
غفه بسد الجفوف

ودگ طبل
جن صوت گلبي
الما تميز
صوته من صوت الدفوف

ودمع عالوجنات سارح
مدري فرحه مدري خوف

وخامه بيضه
إمن الجفن ذاك الشريته
بماي گصتي
ضامه الطين الجروف

حته نيشانك يصير
واليظل من خامِ الأبيض
بي الف روحي وإطوف

هناك
يامسحاه ترحمك
ياحبيبي
ومايطگ نهرين دم

هناك
يا ليل اليسترك
لوطحت عاري إعله ظهرك
ما تظل ذرة قيم

هناك
مثل الوردة تگضي
إمداعب وشهگات شم

هناك
برزخ بي عذاب وَحَجيه ذم

والمتون تصير عروه
وتبدي تهفت
بين آه وبين أوف

هناك
تعمه وما تشوف

أرد انشدك
ليش ضيعت السنين
وليش شگيت الظروف

وصرت أسوهي بغير عقلي
وأمشي وأَجمع بالحروف

جان گتلي
أفديك عمري
ولاتطب طبة حرامي
تفرهد أحلامي وتحوف

جان گتلي
بيدي أوج نار الموادع
وبيدي
أرسمك أحلى لوحة
وجا عرضتك ع طيوف

جان گتلي
هذا حدي
وهذا جرحك
حته ما أتعبَ اليروف

ليش هجي
تغافل عيوني وتروح
ليش هجي
إتعلم أسراري وتبوح
ليش هجي
عطرك الغيري يفوح

أن شاء الله يصير الكسوف
أن شاء الله يصير الخسوف







همام الزغيبي

[انثى مخمليةة]

عاشت ايدك