دمك غبش صوب الشمس....جاب العشگ جاب الضوه
ترسم خلودك بالسحگ....مخنوگ وتوزع هوه
ماهمتك خيــل . واضح ضوه بليــل . ترسم خلودك
___________________________
گلبك مثل گلب النخل تنطي اليحن والما يحن
تنطش ضوه بحظن الرمل كلما طفه الشوف ابحزن
ضيع سمارك بالسحگ بس انته ياس وتنطحن
ميت نعم واطشرت مثل الورد ماتندفن
ظل عطره تذكار . وي كل وطن صار
. ترسم خلودك
___________________________
من أول محطات العطش سافر جبينك للحجر
واتبسمت للحب وطن كل ضايع بگلبك عثر
بگد ماشرب بيك العطش تتبده لليعطش نهر
نجمه وگمر بيك وعشگ مايحـله من غيرك سهر
يامحله ملگاك . خلينه وياك . ترسم خلودك
___________________________
ماشاك شباچ الألم ألف وتسع ميه ورجع
دمك يسافر للشمس ينزل مثل دمع الشمع
بخيامك أيام اشكثر واعله الجرف عايف نبع
ماتطفه بارد مشتـعل من كل كتر حابس دمع
معلم الزرع دوم . من ينطش إيگوم . ترسم خلودك
___________________________
كلما يمر حافر فرس فوگ الصدر يهدم حلم
ياخذنه وياك الألم حد مايـفـززنه اليتم
واتنطر اهلالك يلم كل المآسي ويبتسم
خاطر نرد شوگ وهله ونلتـم عسـه وما نـنثلم
نلتم عشگ بيك . ونصلي طاريك . ترسم خلودك
___________________________
كلما تضيگ الدنيه احس بس انته التملك للهوه
وامشيلك اتمنه ابگلب كلما برد كون انچوه
يامن خـذوا راسك شمس من ذبحوا احلامك ضوه
اشما تقره للعالم جرح بس انته يقرونك دوه
ماتنقره بهاي . يا أول الماي . ترسم خلودك
___________________________
كلمات الشاعر : مقتدى محمد
___________________________
تحمـيل mp3
رد مع اقتباس
المشاركة الأصلية كتبت بواسطة صفاء العامري
