هنا

[أنثى حائرة]

السلام عليكم
محتاجة مساعدتكم يمكن البعض راح يشوف مشكلتي تافهه واني مكبره الموضوع بس فعليا نفسيتي حيل تعبانة ومخنوكة ومكضيه اليوم كله تفكير احس صار عندي وسواس من الموضوع
باختصار قصتي اني احب شخص واستمرت علاقتنا سنيتن وانفصالنا اني قررت اانهي العلاقه لن شفت مالها نهايه وابوه جان جدا رافض الموضوع ومن النوع المسيطر وشخصيته صعبه وما يتقنع ومشاكل ثاني فقررت انهي العلاقه وانفصلنا تقريبا بالتفاهم والولد طول السنيين ما بدر منه شي مو زين حتئ صور اهله وامه يدزلياهن عرفني علئ اهله واكثر من مره امه حاجتني
مشكلتي هسه اني صار فتره احلم احلام واكو كروب بالفيس هذا مفسر كلما يفسرلي حلمي يطلع مو زين وبي مشاكل علئ هذا الشخص حتئ اذا الحلم مابي هذا الشخص من يفسرليا يربطه بي واني راح يسببلي مشاكل اخر شي اليوم كالي راح تعرفين عنه شي وراح ينطي سرج لاحد
هذا الشخص ما يعرف عني سر غير علاقتنا واني متاكده من حبه واخلاقه
بس صار عندي خوف وقلق وتفكير هاي الاحلام تتحقق وتصيرلي مشاكل ويا اهلي ويطلع تفسير هذا الرجال صحيح وصلت لمرحلة مكضيه اليوم كله كلشي ماسوي بس افكر وخايفه يتحققن خاصة اني بفتره بحياتي جنت شنو احلم يتحقق
وماعرف شسوي وشلون اتخلص من هالشي كمت اشك بنية هذا الشخص يكون مثل ما كال
احاول انسئ تفسيره الهي نفسي باي شي مو كادره كمت اخاف انام اخاف هم احلم حلم مو زين بعد ياكد كلامه وتفسيره واني هالسنة اخر سنة الي بالجامعه كمت اخاف يصير شي ميخليني اكمل دراستي
كل شوية يجي تفكير ابالي شكل

[Dr.Asom]

لا حبيبتي رب العالمين ما يسوي شي يأذينه بي ومدام انتي متاكدة من هذا الشخص زين يعني ما يطلع منه هيج شي واكيد هو جان يحبج لذلك ما راح يقبل تتاذين وثانيا لا تصدكين الفيس بكلشي .تفسير الحلم انواع مو الا بالنص يجي يعني مرات يصير العكس او هو اشارة لغير شي ...لا تعبين روحج بالتفكير وانتبهي لدراستج وبعدين انتي ما مسوية شي غلط وياه يعني مجرد حبيتو بعض وانفصلتوا يعني ما الها داعي للتوتر...

اتمنالج السعادة عمري

[فقار الكرخي]

طبعا تفاجئت بنهاية كلامج من كلتي طالبة كلية مرحلة اخيرة ؟
لعد شبقيتي للغير متعلم ؟
يعني لنفرض هذا مفسر الاحلام كالج راح تموتين . يعني اذا ما متي شلون تموتين نفسج ؟

شوفي خلي احجيلج هاي الرواية يجوز تفيدج .

هاي اكو مرأة بزمن النبي ص
رجلها حطاب
يروح يجيب حطب ويبيع
يتأخر على اهلة اسبوع يالا يجي .
زوجته حلمت حلم مفزع
حلمت ان عامود الخيمه مالتها انكسر
ووكعت عليها الخيمه .
راحت مفجوعه للنبي ص وحجتلة الحلم
النبي كاللها لاتخافين هذا حلمج يبشر بالخير
راح يجيج رجلج محمل بالرزق والخير .
كلتلة شلون مو هو عامود البيت وحلمت بي انكسر
كاللها معليج هذا تفسير حلمج يجي سالم غانم بالرزق .
وبالفعل ورة اسبوع اجة جايب كومة فلوس واشياء هواي الله رازقة بيهن .

ورة فترة وتكرر الحلم
وهم راحت للنبي وهم فسرلها الحلم نفس تفسير الاول
وصدك رجع محمل بالفلوس

وفي يوم من الايام جان النبي بالحج
وحلمت نفس الحلم
ان عامود الخيمة مالتها ينكسر
وراحت على عمر ابن الخطاب
حجتلة الحلم .
كاللها راح يرجع رجلج مكسور ضهرة
وينهجم بيتج .
المرأة تخبلت .
انتظرت الى ان رجع زوجها
وشايلي بعربانه
مكسور ضهرة وبي شلل .

انتضرت النبي يرجع من الحج وسألته
هو نفس الحلم الجنت احلمه و تفسرة الي يطلع خير
ليش من عمر ابن الخطاب فسرة صار هيج بزوجي .
كاللها اي حلم حتى اذا موزين
لازم تفسرة بخير وبشرى حتى يذهب الشر

والحلم ثلاثة اشياء

اما بشرى من الرحمن
او رجسا من الشيطان
او ما كان يفكر به الانسان


المهم مادري شحجيت وهيج طولت
بس نصيحة اخذيها مني .

هذا حبيبج القديم
اشرف من هذا الجاي يفسرلج الاحلام

[هــاجــر]

بصراحه انتِ كلش مونسه مفسر الاحلام .. ومبين هواي متونس هو لان كل حلم يربطه الج بذاك الشخص

كل الي براسج مجرد افكار لا وجود لها والاحلام مجرد حديث نفس او ممكن الاحلام مالها علاقه بالشخص لكن المفسر مصر يخليه بكل الاحداث

هدئي من روعك واقتصي هي الافكار

[جنـات]

اكو علماء فسرو الأحلام
انو تعبر عن الرغبه المكبوته باعماق النفس
سواء كانت الرغبه خير او شر
بإختصار يعني الاحلام تعبر عن الرغبات الي يفكر بيها الإنسان وميكدر يسويها بالواقع فيحلم بيها
حبيبي انتي دتفكرين هواي بهالشي وخايفه
لذلك تشوفين هيج منامات

كل تفسير يفسرو الج ما اله اي صحه ناصبين عليج