قصيدة : ما يستقر الوضع
للشاعر : السيد عبدالخالق المحنه
المناسبة : ليلة 10 محرم 1441هـ
المكان:ديوان الكفيل - لندن

ما يستقر الوضع إلا بگطع منحر نبي
ما يستراح الزمن لو ما أخذ زينب سبي
يا دمعي انتظر ... موعدنه الظهر
«««««««««««««««««««««««««
أشوف الليل ملتم كله عالماي
أشوف الگمر رايح والسهم جاي
أحس إجدام غربه تمشي وياي
و أشوف الطف شمر و أدموعنه هواي
يا ويلي كلبي رجف كلشي أختلف حتى الهوه
ما أدري ليش السمه بلون الدمه وبلا ضوه
واضح يا فجر ... موعدنه الظهر
««««««««««««««««««««««««« ««
گبل لا يبدي باچر عندي أخبار
صرت كلشي أشوفه مختلف صار
خيم ماكو خيم گدامي بس نار
لهب خيمه و حوافر تسحگ صغار
وين انطي وجهي وشفت بين الزلم ركضة خدر
وبكل مكان أستمع ونة سبي و ضحكة شمر
كل هذا يمر .... موعدنه الظهر
««««««««««««««««««««««««
شفت رگبة عبد الله محلاه
عليها حرمله مسدد يويلاه
يمد إيده الطفل من تنزل دماه
يظن ماي العذب من شدة ظماه
مالت رگبته وبقت صوب النهر عين الطفل
وبحضن ابوه منذبح وأنه صحت يا أبا الفضل
والسهم الغدر .... موعدنه الظهر
««««««««««««««««««««««««
أباوع للكفيل وگلبي مذعور
أشوفه بلا چفوف وگتله مشكور
سهم بالعين أشوف وراس مطبور
أشوف حسين يمه وظهره مكسور
كل هذا باچر يمر وانه يظل بيه نفس
ومخدرات الوصي باجر منو إلهن حرس
انه واليسر ... موعدنه الظهر
«««««««««««««««««««««««««
أصد لنحر أخويه وجسمي مشلول
أشوف الشمر يمه وسيفه مسلول
على صدره شفت تترافس خيول
أغمض العين أشوف حسين مچتول
كلما اشوف النحر أنظر شمر مغضب لفه
واسمع يسب فاطمة ويذبح أخي من الگفه
ويرد المُهر ... موعدنه الظهر
««««««««««««««««««««««««« «««««
گبل مصباح باچر أسمع صياح
جثث مسلوبه كلها وروس برماح
هذاك يصيح زينب كافلچ راح
هذاك بسوطه جاي يطلع ارواح
كلها على زينب تجي باچر إذا طاح الولي
الساتر الله شكثر اسمع زلم تشتم علي
وسياط شكثر .... موعدنه الظهر
««««««««««««««««««««««««
اريد اسئل اخوتي وحتى الايام
اذا حرة وأسيرة رادت تنام
ولا عدها ستار ولا أكو خيام
حرسها مو زلم بس صاروا أزلام
ما تغفى حرة ابد وأدري الحرس فاگد شرف
راح انتظر فزعته حيدر يجي من النجف
خوفي من العذر ... موعدنه الظهر
««««««««««««««««««««««««« «
أشوف على النهر شيعه يلطمون
مثل ونات كلبي من يونون
على رماد الخيم كاموا يطبرون
علي حيـــــدر يصيحون
يالتطبر وهامتك للمنذبح تنزف دمه
ما قصرت والاجر عد فاطمه
يا محلى الاجر ... موعدنه الظهر

--------------------------------------