مازورك مو خله بحبك
خايف تنهشني الغربان

خايف من طلقة حراسك
لاتاخذ كلبي التعبان

لايكطع جفي المتشرع
لو شاقيتك
لو كتلك بعدك عطشان

لو كتلك كل هاي فلوسك
كل هاي الضويات ابيتك
وهذا الذهب ع البيبان

لو كتلك انزل للشارع
تشوف وجوه الناس التلهث
جوعان يسلب بجوعان

شراح تسوي ؟
راح تصدر فتوة بحقي
راح تكفرني وتسجني
راح توصيلي السجان

راح تكلهم ملحد هذا
الخنزير اطهر من عنده
مايملك صفة الانسان

نكطع راسه
ونكطع نسله
ونضيعه ونضيع اهله
هذا الملعون الوهمان

لو تسمعني
وتنزل من عرشك لبساطي
وتشاركني الخبزة السمرة

ومن تعطش ماتشرب زمزم
تشرب من اميتي المرة

وتكول اسف
سكن الجايع
اوجب من ترميم الحضرة

وتلغي ثواباتك
والضجة
وصوت السماعات الغبرة

وتشيل التعب من جفوفي
وتشيل الشك من عروكي
وتشطب كلمن صاير ثغره

وتبني مدارس
تصنع جيل يحب الدنيا
جيل يحب تراب بلاده
جداً اسف يامولاي
اسمك صاير اكبر عثرة

معظم انصارك(خدامك) شالوا
سوو ثروة
ثروة من وجوه الجياع
صاحوا بسمك
وطاحت كل الوادم فقرة

اعرف هاي الكلمة تخصمن
والجايع يفهم ع الجايع
انت الوتر الغنه الحرية الموجودة
وانت الكمرة

يل مذبوح بجذب احبابك
ويل المظلوم بدك اللطامة البدروبك

انت شراع لكل مجروح
لكل ملجوم
لليرخص جي يرفض ظالم
انت عيونه وصوته وسعره.





أزهر كريم