تموت الناس .. بلا أنفاس
يمالك روحي إنته
أحس گلبي تركته
بلا أنفاس
________________
يبلسم ودع اجروحي
يروحي الطالع ابروحي
يانفاسي
بعدك مارحت خطوه
شيب الحزن والبلوه
ترس راسي
علي ليل الهضم عسعس
ظلام اوحشة اتنفس
حكم قاسي
تموت الفرحه من دونك
بحساسي صحت هونك
عله احساسي
تريد افراگ .. وبديت اشتاگ
واگول الجيه يمته !
أحس گلبي تركته
بلا أنفاس
________________
بعد ماباديه الفرگه
وانه احچيلك عله الملگه
اشتحاچيني
إذا ناوي تودعني
اگلك لا تضيعني
يضي عيني
اسولف وانه مذهوله
يالمفرحني معقوله
تبچيني
عجيبه شلون اظل عدله
عمر بفراگ شيحمله
اشــيسليني !
يروح الروح . اعيش اجروح
يباب الله ورحمته
أحس گلبي تركته
بلا أنفاس
________________
الضعن للطف اذا يمشي
يبطل گلبي من كولشي
شسويله !
لإن دمه اوشرايينه
وجودك وانته تكوينه
اوتفاصيله
شگول اوفرگتك موتي
ابغيابك بيتي تابوتي
يقنديله
صحت يرايح ادعيلي
صلاة الوحشه صليلي
مع العيله
صلاة اوداع .. تبچـي الگاع
عله الـ بالفرگه ميته
أحس گلبي تركته
بلا أنفاس
________________
يسألون اشكـثر ولدي
وتجاوب دمعتي ابخدي
ولا واحد
لإن يحسين اولادي
إلك والبضعة الهادي
وعلي الشاهد
انذرتهم وانه ممنونه
النذر مني تقبلونه
فضل زايد
فدائك أم گمر هاشم
اريدك بس ترد سالم
إلي گاصد
شنو الأولاد .. لابو السجاد
العمر بسمك كتبته
أحس گلبي تركته
بلا أنفاس
________________
ييوسف عمري شحچيلك
مثل يعگوب ابچيلك
نعم واكثر
العجاف السبعه يوميه
يعيشن والقحط بيه
يبو الاكبر
سنايل روحي ذبلانه
وحگ عباس عطشانه
عداك الشر
العمر هم حلت أرضه
العزيز انته ولا ترضه
يمسني الضر
أريد الكيـل .. تردلي الحيـل
نظر عيني أخذته
أحس گلبي تركته
بلا أنفاس
________________
قميصك يمته ألزمنه
أحس لمن اشمنه
اشمنك
بياض اعيوني يتحول
مثل ماچان بالأول
واشوفنك
انوح ابيت احزاني
يغالي اشعجب ماجاني
خبر منك
أصلي وادعي ليليه
ولو بس طيف مر بيه
اريدنك
رغم مانام .. تجيني احلام
حلم بـاليقضه شفته
أحس گلبي تركته
بلا أنفاس
________________
حلم وانظرله باليقضه
جسم من دمه يتوضه
بلا راسه
عدل والرگبه مگطوعه
ترض الخيل بضلوعه
عطش جاسه
گلت هذا ابو اليمه
الحوافر تاكل ابجسمه
الشمر داسه
يگلبي ذبحوا احسينك
صحت مذهوله چا وينك
يـ عباسه
شفت الچفوف .. اوعلم ملفوف
كفيل امفارگ إخته
أحس گلبي تركته
بلا أنفاس
________________
كلمات الشاعر : وسـام الشـويلي
رد مع اقتباس