كلمات قصيدة مسا الخير - باسم الكربلائي (مكتوبة) الشاعر احمد الذهبي -ليلة 3 محرم 1441 / 2019
مسا الخير على اسمك وإنته غايب
مسا الخير عليك وعالحبايب
بويه واليوم الشمس
سلمت مو مثل أمس !
........ ........ ........ .......
إجت بويه المسيه وانه كل بالي يمك
رفعت اثنين إديه دعيت الله يسلمك
اذا بالك عليه عليك ابداعة امك
ردت عطرك هديه تودي حته اشمك
حرب هاي منو يوديلي عطرك
حرب هاي يمن عمري اعله عمرك
والحرب موت وعرس
سلمت مو مثل أمس !
........ ........ ........ .......
على احوالك سؤالي يبويه آنه الوحيده
يمن ساكن خيالي وانه عنك بعيده
صعب واعرف يغالي ولكن شي اريده
اذا طيفك اجاني انام انه اعله ايده
ولو طيف يجي منك واشوفه
ولو طيف احظنه وما اعوفه
جوه عيني ينحبس
سلمت مو مثل أمس !
........ ........ ........ .......
خفت ابعث كتابي واذا يوصل يعذبك
يالمتعبك غيابي بعد ماريد اتعبك
كتبت انه اعله بابي يبويه شگد احبك
ردت تسمع عتابي وتخليني اعله گلبك
اذا جيت تجي كل ذكرياتي
اذا جيت واشم ريحة خواتي
بويه وتهيد النفس
سلمت مو مثل أمس !
........ ........ ........ .......
ردت جيتك ولكن شفتها اهوايه صعبه
يمن بعيوني ساكن طلب منك اطلبه
اخذهن وي ضواهن تـراك ابديره غربه
اذا مطرت سماهن اخذ ميهن واشربه
شنو عيون إذا يرحل دلالي
شنو عيون إذا مابيها غالي
بيها رسمك ينعكس
سلمت مو مثل أمس !
........ ........ ........ .......
يمن إيدك حمامه للموادع شلتها
على چفوفك علامه أثر بوسه اتركتها
صدى الليل وظلامه يگولون امسحتها
اذا جنت ابسلامه وعدل چا ماعفتها
صحت آه خفت لا شي جرالك
صحت آه يبويه اويا دلالك
بالجرح گمت آنه احس
سلمت مو مثل أمس !
........ ........ ........ .......
حلم للطف خذاني وكأن بعيوني شفتك
نعم شفتك تراني ولكن ماعرفتك
ردت أعصر حناني واحط ماي شفتك
سهم ماخذ مكاني وجرحني بس حظنتك
نهر ماي إجيتك وانته ضامي
نهر ماي اشوفك وانته دامي
بويه واتـسولف همّس
سلمت مو مثل أمس !
........ ........ ........ .......
تصب عين المشاعر دمع كل ما اذكرك
حلم بُعدك خناجر على عيون الينطرك
شفت طولك يسافر رمح وابراسه نحرك
شفت كلهن حوافر مكاناتي اعله صدرك
مسه الموت عليك وعالشريعه
مسه الموت عله اجفوف الكطيعه
رايه إلك ما تنتكس
سلمت مو مثل أمس !
........ ........ ........ .......
كلمات الشاعر : احمد الذهبي
........ ........ ........ .......
تحميــلmp3
رد مع اقتباس