تعبني تفكيري وگمت بالگوه انامن ليلي
كل الرسايل والصور عـن فرگتك تحچيلي
ليش من اجيس أذني گمت تتحسر وتبچيلي
وتگلي ترچيتج منو السلّبـها بس گليلي
تسألني اعله ترچيتي، وانه مضيعه عافيتي
صرت ورگه وغصن ذابل عگب عينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
ياغبشة الله اعله الورد لاتمشي وتفارگني
صحت ابغلاتك عـالرمح عوف الرمح واشبگني
ظليت افكر بالسبي وطاري اليسر خانگني
من ترحل بگد ذبحـتك راح الرمـل يحرگني
مثل الطير بالمطره، اركض بويه بالصحره
صورة حزني مرسومه على اجـبينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
وماتنفع اسنينـچ بعد ظرف الرسايل يقره
كسرت گـفاي ابكربله گد كسرتك عـالزهره
ينطيك گلبك نفترگ وتهون ذيچ العشره
ابگد عمري دورلي حبل ماريد عمـره اشكبره
جرحي ابكبر عبدالله، وهيه العافيه من الله
تون والنوگ بويه اتون على ونينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
طالت ابوجهك صفنتي وعرگت صــورك ابيـه
مو انته التلوحه الشمس يا قُل هوَ الحنيـه
ما ادري بـسياط المتن هاگد ثگيله اعليه
ليش السطرني اعله الوجه ماگال هاي ابنيـه
مرات اليهضمونه، ايسولف جرحه بعيونه
وسط حشاي بويه اتشب جوانينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
لما تگرب الفرگه، يعطش حظني للملگه
هجرك ياكل ابگلبي صحت وينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
وروحي اعليك اتعودت لاتمشي وتخليني
مر بيه لو حتى بحلم خل بيك اكحل عيني
چنت من انام اذكر گبل بچفوفك اتغطيني
شبسرعه عشرتنـه انتهت وباگي الوداع اسنيني
يامحله الهلا بحلگك، بويه شگد أحب خلگك
اتيه ابقصتي من اكتب عناوينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
چانت رقيه ابكل وكت تشتم عبير انفاسك
وحته الهوه ايعوف الهوه لو سولفت بإحساسك
موعدنه يم طشت الذهب لو يمي جابوا راسك
اشهك واموت اعله الطشت واكسر گـلب عباسك
اخلي راسك ابحظني، واصيحن ليش عايفني
گـرب موتي وردت اغفه اعله چـفينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
لما تگرب الفرگه، يعطش حظني للملگه
هجرك ياكل ابگلبي صحت وينك
مرات الحچي اشكتره، وكله ينحچي ابنظره
ماشوفن گمت، دربي صحت، وينك
كلمات الشاعر : تحسين الخفاجي
تحميل القصيدة mp3
رد مع اقتباس
المشاركة الأصلية كتبت بواسطة Suhaila wisam
