انا واحد من البگلوبهم حافر
التچويهم الدمعه بليلة العاشر
انا الأتنفس ترابك من الزوار
واتفدالهم من خاطر الخاطر
خدمّتك بالطموح أول الأتمنى
وكلشي ما عداك ايصير بالآخر
......................................
انا من صغري طموحي غير الاول ما أصير
ماعدا الشي اليخصك أرضى حته لو أخير
لو تخيرني وقتها لحظة يمك ما احير
أترك الدنيا وأهلها وخادم ابابك أصير
انته يلي .. وجهك من اشتاگ إله
نبضي يسكت .. والگه گلبي ابكربله
يمن بيك أسست هيبتي اوكياني
أحن ليك لو بعد شوفك ابثواني
انته مو هسه قراري.. هذا بالذر اختياري
ياحبيبي...ياحبيبي ياحسين
ومن يجي ابالي محرم انا احسك انته جاي
تدري من أبچيلك انا انولد باللحظة هاي
سيدي واشعر قليلة من أگول انته هواي
كون أذوب اوياك گلي حته أثوب روحي ماي
بالمجالس .. حته صوتي ينسمع
وتعرفني .. واحد امغرگ الدمع
انا الشاب والطفل والكهل صفاتي
وانا البيك ميزت قيمتي بحياتي
من ابوي انته وصية .. عهدي يبقه للمنية
ياحبيبي...ياحبيبي ياحسين
ومن أعبر عن ولائي مو ملامح إنكسار
انا أدگ صدري وأكسّره حته اطلع منه نار
انته مو حيَّ الله دمعه لو عِباره لو شِعار
من اهل ادموع لجلك انا ماخذ بيها ثار
مانسيتك .. غصبن اعله الذاكره
روحي مجلس .. وانته بيها تنقره
انا وياك سيدي ماخفت ملامه
وانا لغار فكرتك جندي مو حمامه
راسمك باللوحه هايه .. موكب وگدامه رايه
ياحبيبي...ياحبيبي
سيدي گلي شسوي حته احس ابحزني راح
ليش ماتنطيني منك وحده من هاي الجراح
وين ماموجود ازورك حته بـالما مُتاح
اعتنيلك للمجره وبالكواكب استراح
انته بيه .. ساكن ابـنبضي عشت
حته اسمك .. من يگولون التفت
ملايين من گبل حجت الولائك
وانا احتار لوردت ألفت انتباهك
هذا هنياله بحياته .. يحظه منك بلتفاته
ياحبيبي...ياحبيبي ياحسين
___________________
كلمات الشاعر : إيهاب المالكي
___________________
لتحميل القصيدة "اضغط هنا"
رد مع اقتباس
المشاركة الأصلية كتبت بواسطة بـــراءة
