وحگ (حوران) ,, و(الفاو)..وثلج (هولير)
وحگ (حوران) ,, و(الفاو)..وثلج (هولير)
يظل اسمك عراق الخير
يشيخ الشرق الاوسط
لا..
يشيخ الكون ..كلها تهون
يجي تراب (الجزيرة) اعمى
اونفز اعيون
ويصرخ (حمورابي)وينتفظ قانون
ويدندن وتر (قيثارك)
تهون ,اتهون
ونشيلك يالشلتنا هواي
(گلگامش)يفز امتون
أنا (انكيدو)اعله حبك يانبي العشاگ
ابهواك امن الزغر مفتون
اشوفك مثل وجه امي
بتجاعيده وسمار اللون
واحسك حيل ابوي الظل عمر مديون
توجعني وأكول افيش
جرحك بي دفو
ياترف ,,يامزيون
يمر بيك الظلام ومايطول بيك
يشرد من شمس عينك
نعم ياشيخ
يالفوگ الگمر تعجد دواوينك
يبو السان الطويل اعله ابو السان العيب
يبو المگوار ,,
لهسه وراس (لندن) بي نياشينك
يبو حظن الورد
للخاطره نعناع
يالمايك يخدرالگاع
يأترف من ندى وطاح اعله خد جوري
يوجدان النثايه ,,المر عليها اوداع
اسمك من امره مادري شيصير ؟
روحي اطير
كلش انتشي ,اولعب فرح چوبي
وأدك مطبگ الغربية
واغني بطور الاجنوبي
وأصير ابن (الملوح)بيك
وتسودن ,,وشگ ثوبي
وحديلك حدي البدوان
وردسلك ردس معدان
ياأنجيل ..ياقرآن,
يبراهيم انا اسماعيل
اعله حلمك رگبتي القربان .؟
عدنان البركي
رد مع اقتباس
