مو صديجي اللي يكَللي اترك وطن
شعر شعبي عراقي
كريم الأسدي ـ برلين
مو صديجي اللي يكَللي اترك وطن
واغتنم فرصة تجيك من الزمن
*******
الوطن حضن امك وحضن امي وحليب
من ثديها الطاهر الثر النجيب
وللي ينكر امه ماينفع طبيب
لعلته ، وتصير أمراضه محن
***********
الوطن نخله ونابته يم الفرات
لو بصف دجله وزهت بيها الحياة
شالت الهامه وسمت فوكَ النبات
ومنها فيّ ورطب أعله من الثمن
***********
الوطن ذاكرتك السوّتك اِنس
واللي جمعت بيك يومك وي أمس
بدون ذاكرتك صرت انته رمس
يمشي لكن ماكو روح وبس بدن
*************
تصدكَ انت الحوت يبلعله كَمر ؟
شوصله لفرقد ، طفر من البحر!؟
لو نبتله جناح عِجبه من الدهر ؟
الخسوف يروح وي مجلس أمن
************
انت تدري شنهو يعني اسم العراق ؟
لو وين آدم نزل من سبعٍ طباق ؟
.. اسأل الأجناب لا تسأل رفاق
يجاوبونك بالصدكَ يابن الوطن
ـــــــــــــــــــــــــ ـــــــ
ملاحظات
ملاحظة ـ 1.. هذا النمط من الكتابة الشعبية هو نمط القصيدة الشعرية الشعبية الكلاسيكية مثلما كان الشاعر الشعبي العراقي يكتبها حتى منتصف القرن العشرين تقريباً حيث حلت القصيدة الشعبية الحديثة التي لا تلتزم بهذا النظام ، وعند البعض مازال هذا النمط الكتابي مستمراً الى الآن وهو يتألف من مطلع من شطرين بقافية واحدة ثم عدة مقاطع رباعية بقوافٍ متعددة
ملاحظة ـ 2 .. ان الأشطر الرباعية المتعددة هنا يجب ان تتوحد القافية في الشطر الأخير من كل رباعي منها مع قافية المطلع في قافية واحدة ، ففي قصيدتنا هذه مثلاً القافية هي حرف النون
ملاحظة ـ 3..هناك إشارة في القصيدة الى اسطورة شعبية تبرر خسوف القمر بالزعم ان حوتاً ضخماً قد ابتلعه
رد مع اقتباس
