قصتي...ضحية الحب الجزء السادس
اليوم البارت مهم جدا مريم راح تعرف اشياء جديدة...
لليل اجوي عمامي وجهالهم كلهم اجتمعوا ووياهم خطار ومرة هم بس ما اجت يمنه ظلينه مستغربين ...شوية ودخل علي اني كمزت صاح بصوت عالي ومبين عصبي.....
سون جاي للخطار....وطلع اني كلش ضجت كلت يمكن اتندم لان حجة وياي البارحة ظليت ضايجة والدمعة بعيوني ...كملنا الجاي اجى مرتضى كناله شكو كال بعدين تعرفن وراح...
ورة شوية وكبت العيطة بالديوان...وسمعت خل تجي البنية ونشوفها اجى علي كال تعالي للديوان....
مريم/اني شسوي...
علي/كتلج تعالي...
مريم/بس خلي البس غير هاي الدشداشة عيب من الناس....
علي/امشي هيج مالي حيل احجي اكثر خلصيني...
ظليت اباوع بوجه عمتي والبنات عمتي هزت ايدها يعني شكو ....
طلعت للديوان ورة علي شفت نفس الولد والرجال الي شفتهم يم الشط ويمهم مرة مبينين من اهل بغداد جدي كلي تعالي هنا....اني كعدت ابصفه بدون سلام المرة كامت تبجي من شافتني....
جدي كال شوفي راح احجي حجي وما تفكين حلكج الا اكمل خوش ....اني هزيت راسي يعني اي واني دايخة من اليصير .....
جدي/شوفي قبل جان عندي ثمن ولد مو سبعة بس واحد منهم راح يشتغل ابغداد وعشك بغدادية ....تقريبا اني استوعبت انه هذا الرجال الجبير الشفته هو ابنه بس اني شعليه ضليت اهز براسي بمعنى اي....
من عشكها كال اريد اتزوجها كتله يلا بوية شكو بيها احسن خبر دلينه عليها واحنا نزوجك كلي بوية هي من بغداد كتله خوش بوية ومن يا عشيرة كال من هيج وهيج عشيرة كتله خوش ....
كلي اني رحت وحاجيت اهلها وهم راضين اني هنا ضجت شلون يروح وما يكلي شنو ما عنده اب ووخوان المهم مشيت كتله خوش سهلة....
كال بوية بس المرة ما ترضه تعيش هنا تريد يم اهلها ابغداد ....صارت مشاكل هواي لحد ما اقتنعت البنية وتزوجت بالعمارة بس كوة راضية المهم حبلت جابت ابنية ....
مريم/اني بس اهز راسي....
جدي/ جابت المرة وبدت المشاكل اريد ارجع لهلي ما حجينه وديناها بقت يم اهلها شهرين والطفلة وياها كتله بوية ما تراضي مرتك وتجيبها كلي بوية ما ترضى تكول بنتي اريدها تعيش ابغداد كتله لعد ما الها رجعة طلكها ....
ما رضى يطلكها وكال اني اروح يم نسابتي اعيش وصارت مشاكل هواي وكتله بعد ما الك رجعه للبيت....
ورة خمسة اشهر رحنا نشوف البنية والطفلة بلكت ترجع للبيت رغم غضبي على ابني ....
رحنه وصلنا دكينا الباب طلعتنه ام البنية والطفلة بيدها كتلها لعد امها وابوها وين ...كلتلي راحو يتونسون وية صديق ابوها والطفلة ظلت يمي هنا اني كمت افور شلون احفادي يتربون يم ناس غربة كتلها لمي غراض الطفلة ....هي ما رضت وظلت تحجي المهم اخذنا البنية وجبتها الطريق كله تبجي وجوعانه ....انطيتها لجدتها وكتلها على السالفة وهسة الطفلة
صارت ابمسؤليتج بعد ....
مريم/اني ظليت مثل الدايخة حسيت هاي الطفلة اني...
جدي/اجو اهل الطفلة اني ما رجعتها لامها كالت اي يلا خليها يمك بس اذا بيكم خير ربوها ساعة وشوفوا منو يحملها.....انوب ورة فترة ظلت تبجي وتعيط اريد بنتي وابوها نفس الحالة هم ....اني كتلهم الي يعوف اطفاله يم غرب ما اظن يعرف شنو معنى التربية ...المهم ظلوا يتعاركون وياي وما نطيتهم الطفلة هي رهمت على جدتها بعد ....وهم ظلوا يجون عليها لحد ما صار عمرها اربع سنين بعد عافوها لحد ما كبرت البنية وهسة اجوي يريدون ياخذوها....
اني حجيت والعبرة خنكتني ....
مريم/وهاي البنية اني مو جدو....
جدي هز راسة والكل ساكت كامت عليه المرة شبكتني والرجال هم ....اني ظليت ما عندي ردة فعل على شي حسيت نفسي بمسلسل او فلم معقولة هيج اني يصير بيه بس جنت اعرف اهلي ما ميتين والكل يجذب عليه ....
مريم/وخروا مني...وهسة والمطلوب شنو...
الرجال الي هو ابوية/ترجعين ويانه لبغداد....
مريم/ما ارجع لبغداد ولا غيرها اني هنا يم عمي وجدتي واليحبني يبقى وياي ....
طلعت كبل للغرفة ابجي ويحاجوني البنات وما ارد الصار ما جاي استوعبه معقولة يربي هيج يصير بيه...
سمعت جدي يكول عوفوها وحدها لحد يحاجيها هنا اني اتذكرت علي من رزلني من ظليت اباوع على الرجال يم الشط عرفت هو يدري وما كلي هو هم ظل ساكت مثل جدي ...كرهت الكل ظليت اشاهك من البجي كرهت جدي لان حرمني من حنان اهلي وحقدت عليه وحقدت على اهلي لان ما اهتموا بيه كرهت كلشي بحياتي .....
اتمنى عجبكم البارت حبايبي...
البارت القادم راح يكون الاخير ....
دمتم بخير
زنبقة الغرام ❤
رد مع اقتباس
المشاركة الأصلية كتبت بواسطة انثى مخمليةة
