هنا

[كبريائي قاهرهم]

بين العباس والحسين عليهما السلام ...
خليني على هــذا الحـــال خـويـه حســين خلـينـي
رضعـانــك تريــد المـــاي وانـــه المــوت واليــني
****************************
حيـن اللي وكَــع عبــاس ينــزف عالترب دمــه
صـاح بصــــوت ادركني يابــن منـقـذ الامــــه
عضيــدك عالتـراب يلوج والعــــدوان ملـتمـــه
وصـــل يمــه ابو السجاد وزيّـــد هالامــر همـه
تعذرلــي يخويــه حسـين من كل جاهل وحرمـه
وسلملــي علــى عبـد الله وخــل لاينتـظر عمــه
وخــل زينـب تسامحــني لأن تدري العهد ذمــه
كَلهه يكَــــول اعذرينــي كَطعــو يختي جفينـي
وصابــو بالســهم عيني وانه الموت واليــنـي
****************************
كَــام حســــين مـــن يمه وبلل مدمعــه خــدوده
مكســــور الظهر ياحيف على العباس وزنــوده
والاصــعب واشـــد حاله مصيوب بسهم جـوده
من روح الكَمـــر فاضــت دنياه اصبحت ســـوده
يكَلـه ياكَمــــر هاشـــــــم ياهـــو المثــلك بـزوده
خذك منــي الدهر عباس يالـوفــاي بـــوعـــوده
كفيـت ونعـــــــم منــــــك الك هالوكَـفه مشـهوده
ياعبـــاس يـــــاوفـــــاي مارايــد يخويه المــاي
ردتك بس تـــــرد وياي وانــه المــوت والــيني
****************************
رد لخيــمـتــه المظلـــوم وعمدهه من الوسط هده
يعنــي استشــهد العباس راح ومـــــا بعــــــــد رده
ومعنـــاها يزينب صــــار حســـين بهالارض وحده
معناها انهــدم ســـــورج الجايـــن للحـــرم ســــده
ومعنـــــاها الشـدد زادت شــــده تتابــــع بشــــــده
زيــنب عرفـــت الحـــاله راح الكَمــــر مــــن عنده
لطمت عالوجــــه زينــب ورادت للــــولي تكَصــده
ردهـــه للخيام حســـــين ويكَلـــهه يمــاي العيـــن
اصبري والصبر هم زين وانـــه المـــــوت واليني
****************************
ظــل حســـين بالحومه يحــارب والظهر مكســور
يتــذكــر اخــــوه الجان خيـمه على الحريم وسور
لو صـــال على عدوانه يرد جيـش الكفـر مذعـور
وياوسفه بمسيل ادمـاه حجـب سيـل الدمه هالنور
حيلــه تهــــدم لفــــركَاه وزاد علـى الغريـب الجور
يكَلـــه بفكَـــدك تهـــــدم بيتــي البالامــس معمــور
ويلي عليـــك ياعبـــاس ياخــويه يبــو النـومــاس
غدرت بيك هاي النـاس وانــه المـــوت والينـــــي
***************************

[مكتب ابو سجاد]

احسنتم
وعظم الله اجوركم

[كبريائي قاهرهم]

شكرا لتواجد بصمتك
بين ثنايا متصفحي
لا حرمنا أطلالتك
خالص ودي و وافر أحترامي

[زهرائية]

احسنتم اخي واثابكم الله لهذا الكلمات الحسينية المؤثرة
عْظَمَ اللهُ اُجُوْرَنَا وَ اُجُوْرَكُمْ بمصاب الحسين عَلَيْه السَلََام
وَ جَعَلَنَا وَ اياكُمْ منَ ال طَالبيَْْن بثَاره مَعَ الإمام المهدي عجل الله فرجه الشريف

[كبريائي قاهرهم]

شاكر لكِ عبق تواجد
بصمتكِ
وعظم الله لكِ الاجر بهذا المصاب الجلل
خالص الاحترام والتقدير

[August]

عظم الله لكم الاجر بمصيبة سيد الشهداء ورزقكم شفاعته

[كبريائي قاهرهم]

وعظم الله اجوركم
بهذا المصاب
وفقنا الله واياكم
لخدمته