طراوة ماي
سهل ويّاي .
سهل كلّش سهل ويّاي .
مثل طبع الهوه ما يبخل بروحه .
مثل فزّة ضوه وهزّة المرجوحه .
سهل ويّاي .
سهل حسنك .....
ينوّمني على خيوط الضوه بهداي ...
ويغطيني بندى وآفياي .
تعط ماي الورد من تكَعد كَبالي ،
وآشمّن جنة الله براحتي وآرتاح ،
وآسكر ، لكن بصنطه ، بلايه صياح .
عينك باب جنه وبسمتك مفتاح .
أعبر من سما عيونك لصوب الله ....
طرب ، مثل الهوى بالناي .
سهل ، كلش سهل ويّاي .
راوي آمنين ما آجيسك طراوة ماي .
ترف ، ما بيك لزمه ، تموع ،
تتبدّه آمن آصابيعي شرايط ماي .
شحلاتك يا بعد عمري !؟
هلكَد رازقي مورّد !!
هلكَد للّمس شايل ترافة ماي !!
هنيالك على طعمك ،
وهنيالي عليك هواي .
#عبدالكريم_القصاب
رد مع اقتباس
