الجزءالتاسع والاخير من قصتي ...همسات التوبة
وصلت العصبية بوسام انه ضرب علياء .....
التفت علياء على وسام ....وكامت تحجي بعصبية ...
هيج وصلت بيك وسام ...لهدرجة وصلت النذالة بيك تركت صلاتك وكلت ميخالف يرتاح ويرجع لصلاته رب العالمين يغفر ....وقبلت تجاهلك وطردك الي وعدم احترامك ....
لكن مال توصل تريد تسكر وتشرب السم هذا وانوب امنعك تضربني ....هيج وصلت ...ليش شسويتلك اني مو واكفة وياك لحظة بلحظة وما عايفتك ابد ....
كل هذا وسام لازم ايده الضرب بيها علياء وصافن على كلامها ما نطق ولا كلمة .....
وسام اعتقد انت اختاريت طريقك واني ميعجبني هذا الطريق ولا نتائجه حلوة ....لذلك لو تعوف طريقك هذا و ارجعلك و تلكاني سند و عون و عضد و كلشي اصيرلك ....او تبقى على هذا حالك التعبان فاني اعتذر بعد انسى وحدة اسمها علياء قابلتها يوم من الايام فاهم لولا .....
اخذت جنطتها وجاي تطلع لزمت الباب والتفتت ....
ها وللعلم ترة علاء محكوم بتلث سنين والولد متندم ونورة بعد تبقى يمي مترجعلكم وانت هذا حالك لان ما تكون سعيدة تسمع انه عدها هيج اخ ....ولا اني اكون سعيدة من اسمع اخبارك بعد ....
لزمت الباب وطلعت وطبكته حيل ورواها ....
ظل وسام صافن على ايده ويعيد بحجي علياء ما يعرف شيسوي كأنما صارت عنده مثل الصدمة الي صحته من الغفلة الي هو بيها .....
اتندم على وضعيته هيج ....ظل كاعد ويفكر .....
بعد ما طلعت علياء من بيت وسام ودموعها بعينها وحابستهن تمشي وتكول بنفسها .....ما اريده بعد ما اريد هيج واحد مو لهدرجة وصلت يريد يسكر وانوب يضربني شنو ما عندي كرامة اني بس اريده يتندم من صدك ويتوب لنفسه مو لحد اريد الله يهديه ....
وصلت علياء للبيت شافت نورة راحت عليها حظنتها وباستها ....كلتلها حبيبتي اذا تبقين وياي عندج مانع يعني تقبلين لولا؟؟؟ ....
اي عادي اني احبج بس لعد و وسام ما اروحله ؟....
ما تعرف شلون تجاوب نور ....
حبيبتي وسام حاليا ما اله واهس لأي شي فأني اكول فد فترة قليلة ابقي وياي وبعدين روحي لاخوج ....
دنكت نورة راسها بحزن....
اوك ماشي علياء ..بس مشتاقة لامي و لوسام ....
كثرت الدموع بعيون علياء رفعت راسها حتى تكدر تخفي دموعها ....
حبيبتي روحي حظري نفسج لدوامج باجر يلا لا تتعطلين ....
ماشي اني رايحة انام لعد تصبحين على خير علياء ....
وانتي من اهل الخير حبيبتي ....
راحت علياء شافت امها لكتها نايمه راحت هي لغرفتها ظلت متمددة وتفكر بكلامها لوسام وتكول بلكت يستوعب ولو ما اظن يرجع وسام القديم بس الله غفور رحيم ....
بعدها حاولت تنام و...غفت ...
كعد وسام من النوم شاف البيت فارغ اشتاق لامه راد يبجي بس سكت ودنك وقراها الفاتحة اتذكر اخوه واشتاقله واخته .....
كال اليوم اروح اشوف علاء شنو وضعه ....
اكل شوية وبدل واخذ اكل وراح للسجن مال علاء ....
من وصل سمحولة بشوفة اخوه من شافه جان متلهف يحظنه بس لا ثكل وجها حتى مرة ثانية يتوب ....
علاء ما كدر يرفع عينه بعين اخوه لان مستحي منه حيل ....
وسام رفع راس اخو بايده وكله انسى علاء الفات مات المهم تكون تعلمت خوش درس ....
اي والله تعلمت ..بس كلي امي شلونها ....
دار وجها وسام عن علاء وكال ....امك ماتت علاء...
لا ....امي....كله من ورة الطمع مالتي ومن ورة درب الخطأ مالتي ....ظل يبجي ...
يلا علاء الراح راح بعد ....المهم دير بالك على نفسك على الجايات ....
ان شاء الله ....
يلا علاء اني رايح ....
الله وياك وسام دير بالك على نفسك ....
طلع وسام من السجن مال اخوه وبالطريق خابر عادل...
الووو ...
يا هلا وسام شلونك شلون صرت ...
الحمد لله احسن بس اريد منك طلب ....
اي كول حبيبي ...
اريدك تدليني كبر امي وين ....لان نسيته ....
اي عادي تدلل اني هسة اجي اخذك ...
تسلم عادل ما اعرف شلون اشكرك ...
وسام شنو السالفة شنو احنا بينا شكر ...
اوك عادل مع السلامة ...
الله وياك اني هسة خمس دقايق واجيك ...
رجع وسام للبيت وظل منتظر عادل ....
اجى عادل واخذه وياه ظل عد كبر امه هواي ورجع للبيت نام شوية وكعد ....
راح لبيت علياء يريد يشوف نورة مشتاقلها ....
دك الباب ....فتحته علياء اتفاجأت ...درات وجها منه....
هو دنك راسه وكال بس اريد اشوف نور بلا زحمة...
اوك اتفضل ...
دخل على نورة ....شافها متلهف عليها ظل حاظنها حيل وهي مكيفة وطايرة من الفرح ....
ظل كاعد وياها سولفوا شوية وعلياء جابتلهم اكل....
وسام ما بطل يباوع على علياء من ادير وجها ومن تباوع عليه يرجع يدير وجها وهاي ظالين هيج....
اخر شي وسام راد يطلع وياخذ وياه نور ....
راح لعلياء ....
علياء صح اني جنت غلطان وحقير بس ....
ما اعرف شكلج والله بس ارجوج تسامحيني علياء وبيتي مفتوحلج واذا ما تريديني بكيفج ....
راح اخذ نورة وطلع وهو مقهور ....
وصل للبيت وطبعا رجع البيت منور ومرتب مليان تفاؤل ....
ظلوا يومين على نفس وضعيتهم ورجع وسام للعبادة والصلاة وازداد بعد قرب من رب العالمين ....
اليوم الثالث كانوا العصر كاعدين نورة و وسام جاي يسولفون ويضحكون واندك الباب عليهم ....
راحت نورة وفتحت الباب وفرحت حيل لان شخص مهم بحياتهم رجعلهم وراح يملي عليهم الوحدة وهو راضي ومقتنع بكل تصرفاتهم ومسامحهم لان هو وعدهم يبقى وياهم للابد....
منو تتوقعون هذا الشخص ....
والى هنا تخلص قصتنا وية وسام وحتى نعرف انه ما تبعدنا مصائب الدنيا عن الايمان بالله تعالى ولازم نظل متمسكين مهما كانت الظروف ...
اتمنى عجبتكم القصة انتظروني بقصص جديدة
دمتم بخير حبايب وشكرا لتفاعلكم ..
زنبقة الغرام ❤
رد مع اقتباس
المشاركة الأصلية كتبت بواسطة رئاب
