مساجلة شعرية روعة
مساجله نعي ارتجال بين الشاعر (زين_كريم) وبين الشاعر مرتضى_الغرباوي .
زين:
حته الشمس مومال أهلنه
تندار غفله أبلا محنه
ربعك عشيره وماكو ضنه
وگفتهم أعله الباب حنه
.
مرتضى:
دش حجرتك لا تلزم الباب
مو ربع ذوله حرورة صواب
دهرك كضيته امبسط اعتاب
حزنك عتيج البسلك انكاب
.
زين:
ياضني دوم ابناسي خايب
تتلگه من ياهو المصايب ؟
جايبلي شيبي وموش شايب
كونك تخلصها گرایب
.
مرتضى:
ضنك مسرفن نيه زينه
وما اجت من ربعك حنينه
شراعك اطيته ليا سفينه
تغرك ومحد تبجي عينه
.
زين:
تغرگ ابسهرك والتتن گیش
والموحنين اينام ويعيش
اسألهم أنه اعله الوفه أبيش ؟
يگلولي يعني شلون مثليش ؟
.
مرتضى
جا يالحنين تنام بردان
حدر القميص انترس دخان
سوك الوفه مفتحينه صحبان
تنباع كلك كون حليان
.
زين:
تحلف عليهم مايبيعون
وتخبص الدنيا من يگبلون
تگضيها وياهم بماعون
تالي أعله موتانه يشتمون
.
مرتضى:
الميتين مو ذوله اليموتون
موتاك البموتك يشمتون
المن ما تمرلهم يفرحون
المن تذبل هدومك يعرسون
.
زين:
ويلاه من صدعات گلبي
عثراتي ربعي بليل دربي
صبي ييمه الزاد صبي
بكيفك بعد وتشوف ربي
.
مرتضى:
ضم دمعتك ملكاك مريود
هو الكلب ممرود ممرود
دمعات عينك مال فرهود
كوم اشتري يرادن السود
رد مع اقتباس
